İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 228 Hüküm no: 200 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Ali’nin mâlik olduğu soğancı dükkânı için kendisine hüccet verildiği Soğancı Mahmiye-i İstanbul’da kâin Odunkapısı tüccârından işbu bâ‘isü’l-kitâb el-Hâc Osman Ağa b. es-Seyyid Ali meclis-i şer‘-i şerîf-i enverde ikrâr-ı tam ve takrîr-i kelâm edip zikr olunan Odunkapısı hâricinde vâki‘ ma‘lûmü’l-hudûd bir bâb Soğancı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeyi işbu yedimde olan bin iki yüz yirmi iki senesi Cemâziyelâhire’sinin on birinci günü târihiyle müverrah bir kıt‘a temessük mantûkunca ol târihte nısfiyet üzere mâlikler olan müteveffâ hamallar kethudâsı İbrahim Ağa ve oğlu müteveffâ İsmail Ağa yedlerinden hayatlarında semen-i ma‘lûm ve medfû‘ ve makbûza iştirâ ve kabz etmemle ol-vechile âlât-ı lâzıme-i mezkûre târih-i mezkûrdan beri el-yevm yedimde << mâlik >> mâlım ve mülk-i müşterâm olup lâkin ber-vech-i muharrer mâlik olduğumu müş‘ir yedimde taraf-ı şer‘den sened olmamağla hakīkat-i hâl vukūf-ı tamları olan işbu hâzırûn bi’l-meclis zeyl-i kitâbda muharrerü’l-esâmî esnâfımızdan lede’l-istihbâr taraf-ı şer‘den yedime bir kıt‘a hüccet i‘tâ olunmak matlûbumdur dedikde fi’l-hakīka hâl bâlâda tahrîr ve terkīm olunduğu üzere olunduğunu kitâbda muharrerü’l-esâmî Müslimîn her biri meclis-i şer‘de alâ-tarîki’ş-şehâde haber vermeleriyle hıfzen li’l-makāl işbu vesîka-i enîka bi’l-ibtiğā sebt ve imlâ olundu. Fî-gurre-i C sene 1238. Şühûdü’l-hâl: Eş-şâhidûne’s-sâbıkūn.