İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 229 Hüküm no: 201 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ağa b. Seyyid İbrahim’in basmacı esnafı kethudalığına tayin edildiği Örnek basmacı esnâfına kethudâ nasbı Mahmiye-i İstanbul’da Sultan Bâyezid-i Veli Han Câmi‘-i şerîfi havlısında mahâll-i sâirede kâin ressâm ta‘bîr olunur örnek basmacı esnâfından es-Seyyid Ahmed Ağa b. Hüseyin ve es-Seyyid Mehmed Emin Ağa b. Ebûbekir ve es-Seyyid Abdi Efendi b. Halil ve es-Seyyid Hasan Ağa b. Ali ve es-Seyyid İbrahim Ağa b. Halil ve es-Seyyid Ali Ağa b. Hüseyin ve diğer es-Seyyid Ahmed Ağa b. Hasan ve es-Seyyid Mehmed İzzet b. es-Seyyid Ahmed ve İsmail Efendi b. Ahmed ve Mehmed Ağa b. Ahmed ve Ali Molla b. Veliyüddin ve Yusuf Ağa b. Ahmed ve Mustafa Ağa b. Ahmed ve es-Seyyid Mustafa Ağa b. Abdulkadir ve Ahmed Ağa b. Hasan ve Mehmed Emin Ağa b. İsmail ve es-Seyyid Ali Tâhir b. Mustafa ve es-Seyyid Mehmed Emin b. Süleyman ve es-Seyyid Yahya b. Abdullah ve Yiğitbaşı es-Seyyid Ömer Ağa b. Ali nâm kimesneler meclis-i şer‘-i hatîr-i lâzımü’t-tevkīrde esnâf-ı mezkûrenin müsin ve ihtiyârlarından işbu bâ‘isü’l-kitâb es-Seyyid Mehmed Ağa b. es-Seyyid İbrahim hâzır olduğu hâlde her biri takrîr-i kelâm ve bast ani’l-merâm edip mezbûr es-Seyyid Mehmed Ağa bir müddetden beri re’y ve ma‘rifetimiz ile beynimiz[de] kethudâ nasb ü ta‘yîn olunup ol-vechile nizâmımıza ri‘âyet ederek esnâfımızın kethudâlık umûrunu idâre ve rü’yet etmekle cümlemiz kendiden hoşnûd ve râzılar olup lâkin merkūm es-Seyyid Mehmed Ağa’nın ber-vech-i muharrer kethudâlığını hâvî sened olmamağla cümlemizin iltimâsımızla yine merkūm kıbel-i şer‘den dahi esnâfımıza kethudâ nasb ve ta‘yîn buyrulup yedine hüccet i‘tâ olunmak cümlemizin matlûbumuzdur dediklerinde hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb - tûbâ-lehû ve hüsnü-meâb- efendi hazretleri dahi merkūm es-Seyyid Mehmed Ağa’yı esnâf-ı mezkûrenin taleb ve iltimâslarıyla üzerlerine kethudâ nasb ü ta‘yîn ve esnâfından bir ferde hilâf-ı şer‘-i şerîf ve mugāyir-i nizâm te‘addî ve rencîde etmemek üzere emr ü tenbîh buyurduklarında ol dahi kabûl ve ber-mûceb-i emr ü tenbîh ve amel ve harekete ta‘ahhüd etmeğin mâ-vaka‘a bi’t-taleb ketb olundu. Fî 23 Ca sene 1238. Şühûdü’l-hâl: Muhzırlar Kethudâsı Hafız İsmail Ağa, Molla Mahmud el-Muhzır, Molla Hüseyin el-Muhzır.