İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 230 Hüküm no: 202 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Usta b. İbrahim’in mâlik olduğu çulha gediğini Yazıköylü Hasan Beşe b. Mustafa’ya sattığı Çulha Mahmiye-i İstanbul’da kâin çulha esnâfından Ali Usta b. İbrahim nâm kimesne meclis-i şer‘-i şerîf-i enverde esnâf-ı merkūme kalfalarından işbu bâ‘isü’l-kitâb Yazıköylü Hasan Beşe b. Mustafa nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Cumartesi pazarında Hoca İdris mahallesinde kâin ma‘lûmü’l-hudûd bir bâb dükkân derûnunda mevcûde beyne’l-esnâf << gedik ta‘bîr olunur >> iki destgâh bir gedik i‘tibâr olunan âlât-ı lâzıme-i ma‘lûmenin bir destgâh gediğini işbu târih-i hüccet günü diğer bir kıt‘a hüccet mantûkunca hâzır bi’l-meclis Hasan Beşe’ye üç yüz altmış guruş semen-i makbûza bey‘ etmemle mâ‘adâsı olup akd-i âti’z-zikrin sudûruna değin yedimde mâlım ve mülküm olan bir aded destgâh nısf gediğimi dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Hasan Beşe’ye üç yüz altmış guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz altmış guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan bir destgâh nısf gedikte benim kat‘a alâka ve medhalim kalmayup merkūm Hasan Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 C sene 1238. Şühûdü’l-hâl: Kethudâ es-Seyyid Ahmed Ağa, Yiğitbaşı Hüseyin Usta, Sarı Mehmed Usta, Hacı Ömer Usta, Edirneli Mehmed Usta.