İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 231 Hüküm no: 203 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Usta b. İbrahim’in mâlik olduğu çulha gediğini Hüseyin Beşe b. Osman’a sattığı Çulha << Mahmiye-i Üsküdar >> Mahmiye-i İstanbul’da kâin çulha esnâfından Ali Usta b. İbrahim nâm kimesne meclis-i şer‘-i şerîf-i enverde esnâf-ı mezkûre kalfalarından işbu bâ‘isü’l-kitâb Hüseyin Beşe b. Osman nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Cumartesi pazarında Hoca İdris mahallesinde kâin ma‘lûmü’l-hudûd bir bâb dükkân derûnunda mevcûde beyne’l-esnâf iki destgâh bir gedik i‘tibâr olunan âlât-ı lâzıme-i ma‘lûmenin bir destgâh nısf gediğini işbu târih-i hüccet günü diğer bir kıt‘a hüccet mantûkunca hâzır bi’l-meclis Yazıköylü Hasan Beşe b. Mustafa’ya üç yüz altmış guruş semen-i makbûza bey‘ etmemle mâ‘adâsı olup akd-i âti’z-zikrin sudûruna değin yedimde mâlım ve mülküm olan bir destgâh nısf gediğimi dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz altmış guruşa merkūm Hüseyin Beşe’ye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edip semeni olan meblağ-ı merkūm üç yüz altmış guruşu bana def‘ ü teslîm ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt [48a] dahi etmemizle fîmâ-ba‘d zikr olunan bir destgâh nısf gedikte benim kat‘a alâka ve medhalim kalmayup merkūm Hüseyin Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 C sene 1238. Şühûdü’l-hâl: Eş-şâhidûne’s-sâbıkūn.