İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 231 Hüküm no: 204 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Avanes v. Adami’nin mâlik olduğu berber gediğini Mustafa Ağa b. Ali’ye sattığı Berber gediği Mahmiye-i İstanbul’da kâin berber esnâfından Haçador v. Avanes v. Adami nâm zimmî tarafından husûs-ı âti’l-beyânı ikrâr ve i‘tâ-i hüccete vekîl olduğu Karabet v. Melkon ve Agop v. Ohan nâm zimmîler şehâdetleriyle sâbit olan Moses v. Minas nâm zimmî meclis-i şer‘-i şerîf-i enverde işbu bâ‘isü’l-kitâb Mustafa Ağa b. Ali nâm kimesne mahzarında bi’l-vekâle ikrâr-ı tam ve takrîr-i kelâm edip müvekkil-i mesfûr Haçador zimmî mahmiye-i İstanbul’da Ebu’l-feth Sultan Mehmed Han -aleyhi’r-rahmetü ve’l-gufrân- hazretlerinin câmi‘-i şerîfleriyle civârında süpürgeciler içinde han tahtında kâin kahve ve koltukçu dükkânları ile mahdûd bir bâb berber dükkânı derûnunda mevcûde işbu başmuhâsebe kaleminde mukayyed beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Mustafa Ağa’ya bin yüz elli guruşa bey‘ ve temlik ve teslîm eylediğimde ol dahi iştirâ ve temellük ve tesellüm ve kabz ü kabûl ve semeni olan meblağ-ı merkūm bin yüz elli guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i mezkûrede benim kat‘a alâka ve medhalim kalmayup merkūm Mustafa Ağa’nın mülkü ve hakkı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 C sene 1238. Şühûdü’l-hâl: Kethudâ vekîli İbrahim Ağa, köşe ustası es-Seyyid Mehmed Şakir Usta, Şeyh Hacı Musa, Du‘âcı el-Hâc Abdullah, Yiğitbaşı es-Seyyid Mehmed Nuri, Çavuş Mustafa Usta.