İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 232 Hüküm no: 205 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarafim v. Atam ve Anaştaşya bt. Yani’nin mâlik oldukları bakkal dükkânını Mihal v. Yani’ye sattıkları Bakkāl Mahmiye-i İstanbul’da kâin bakkāl esnâfından Sarafim v. Atam nâm zimmî meclis-i şer‘-i hatîr-i lâzımü’t-tevkīrde şahsı ta‘rîf-i şer‘î ile mu‘arrefe olan Anaştaşya bt. Yani Nasrâniyenin hâzıra olduğu hâlde mersûme Anaştaşya Nasrâniyenin li-ebeveyn er karındaşı işbu hâmilü’r-rakīm Mihal v. el-mesfûr Yani nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede Ayvansaray kapısı dâhilinde vâki‘ hâzırcıbaşı dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yirmi sehmi benim ve altmış altı sehm hisse-i şâyi‘ası hâzıra-i mersûme Anaştaşya Nasrâniyenin ve yirmi altı sehm hisse-i şâyi‘ası bundan akdem hâlik olan Yorgi zimmî veresesinin yedimizde iştirâken ve şâyi‘an mâlımız ve mülkümüz olmağla hâzıra-i mersûme Anaştaşya Nasrâniye âlât-ı lâzıme-i mezkûreden akd-i âti’z-zikrin sudûruna değin ber-i‘tibâr-ı merkūm mâlike olduğu altmış altı sehm hisse-i şâyi‘asının altmış sehmini mülkünde ibkā ve mâ‘adâ altı sehm hisse-i şâyi‘asını iki yüz guruşa ve ben kezâlik i‘tibâr-ı mezkûr üzere yedimde mâlım olan yirmi sekiz sehm hisse-i şâyi‘a-i mezkûremi bin altı yüz elli guruşa her birimiz tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i sâiremiz izni ve icâzetleri ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle mersûm Mihal zimmîye bey‘ ve temlik ve vech-i lâyıkı üzere teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semenleri olan meblağ-ı mezkûr iki yüz guruşu hâzıra-i mersûme ve meblağ-ı merkūm bin altı yüz elli guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i merkūmenin ber-i‘tibâr-ı merkūm ancak altı sehminde hâzıra-i mersûme Anaştaşya Nasrâniyenin ve diğer yirmi sekiz sehminde benim kat‘a alâka ve medhalim kalmayup ol-vechile cem‘an otuz dört sehmi mersûm Mihal zimmînin mâl-ı müşterâsı ve hakk-ı sırfı olmuşdur deyü Mihal zimmîden her biri gıbbe’t-tasdîk [i’ş-şer‘î mâ-vaka‘a bi’t-taleb ketb olundu.] Fî 6 C sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Kābız-ı mâl Simyon v. Todori, Yazıcı Eftat v. İstavri, Yuvan v. İstati, Çakıroğlu Yorgi, Lazar.