İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 233 Hüküm no: 206 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Halil’in mâlik olduğu tuzcu gediğini damadı Hafız Ahmed Ağa b. Abdullah’a sattığı Tuzcu gediği Kaydı ihrâc şüd fî 29 Ca sene [12]72. Kaydı ihrâc şüd fî 15 M [12]74. Mahmiye-i İstanbul’da Harâccı Muhyiddin Mahallesi sâkinelerinden ve zâtı ta‘rîf-i şer‘î ile mu‘arrefe olan Rukiye Hatun bt. Halil kendi nefsinden asâleten ve sadriye kebîre kızı Emine Hatun bt. Ahmed tarafından husûs-ı âtiyyü’l-beyânda vekîl olduğu zât-ı mezbûreyi bi’l-ma‘rifeti’ş-şer‘iye ârifân Bezzâzistânî es-Seyyid Veliyüddin Ağa b. es-Seyyid İsmail ve Tuzcu el-Hâc İbrahim Edhem Ağa b. Halil nâm kimesneler şehâdetleriyle ber-nehc-i şer‘î sâbit olmağla vekâleten meclis-i şer‘-i şerîf-i enverde tuzcu esnâfından işbu bâ‘isü’l-kitâb dâmâdı Hafız Ahmed Ağa b. Abdullah nâm kimesne mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Zindân kapısı hâricinde hasır iskelesi kurbünde tuzcular sûkunda kâin bir tarafdan tuz emîni mağazası ve bir tarafdan tütüncüler kethudâsı vekîli es-Seyyid Mustafa Ağa mağazası ve tarafeyni tarîk-i âm ile mahdûd köşede vâki‘ bir bâb tuzcu dükkânı derûnunda mevcûde yüz yirmi sehm i‘tibâriyle altmış sehmi benim ve altmış sehmi kızım müvekkile-i mezbûre Emine Hatun’un akd-i âtiyyü’z-zikrin sudûruna değin yedlerimizde mâlımız ve mülkümüz olan beyne’l-esnâf gedik ta‘bîr olunur bir keyl ve bir şinik ve bir değirmen ve bir terâzî ma‘a derâhim ve sâir tuzcu âlât-ı lâzıme-i ma‘lûmelerimizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin guruşa dâmâdım mezbûr Tuzcu Hafız Ahmed Ağa’ya bi’l-asâle ve bi’l-vekâle bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden bi’l-asâle ve bi’l-vekâle tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî asâleten ve vekâleten ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim ve kızım müvekkile-i mezbûre Emine Hatun’un kat‘a alâka ve medhalimiz kalmayup dâmâdım mezbûr Tuzcu Hafız Ahmed Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 C sene 1238. Şühûdü’l-hâl: Kethudâ es-Seyyid Ömer Ağa b. Es-Seyyid Halil, el-Hâc Hüseyin, Osman Bey b. ( ), Yiğitbaşı es-Seyyid Mahmud Ağa b. es-Seyyid Ahmed, es-Seyyid Hüseyin Ağa b. Osman, es-Seyyid İbrahim Ağa b. es-Seyyid Hasan.