İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 234 Hüküm no: 207 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdesar v. Kazer’in mâlik olduğu aşçı ve hoşafçı gediğini Avakim v. Kigork’a sattığı Aşçı ve hoşâbcı gediği Mahmiye-i İstanbul’da kâin aşçı ve hoşâbcı esnâfından derûn-ı hüccetde mastûrü’l-ism Bağdesar v. Kazer nâm zimmî meclis-i şer‘-i hatîrde esnâf-ı mezkûreden kezâlik derûn-ı hüccetde ismi mastûr Avakim v. << Kirgob >> Kigork nâm zimmî muvâcehesinde ikrâr-ı tam ve takrîr-i kelâm edip derûn-ı hüccetde tahrîr ve beyân olunduğu üzere mahmiye-i İstanbul’da Laleli kurbünde Çukurçeşme nâm mahâlde vâki‘ ma‘lûmü’l-hudûd bir bâb aşçı ve hoşâbcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfı benim ve nısf-ı âharı mersûm Avakim zimmînin yedimizde akd-i âti’z-zikrin sudûruna değin iştirâken mâlımız ve mülkümüz olmağla ben ber-minvâl-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile sâhib-i evveli mersûm Avakim zimmîye iki bin dokuz yüz elli guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm iki bin dokuz yüz elli guruşu bana def‘ ü teslîm ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup nısfı mukaddemâ ve nısf-ı âharı hâlâ ber-minvâl-i [muharrer] şirâen ki mecmû‘u kemâ-fi’s-sâbık mesfûr Avakim zimmînin mâlı ve mülkü ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 C sene 1238. Şühûdü’l-hâl: Kethudâ Hüseyin Ağa b. Ahmed, Yiğitbaşı Ali Ağa b. Hüseyin, mütevellî Mehmed Emin Ağa b. Ahmed, Yazıcı es-Seyyid Mehmed Eşref Ağa b. Mustafa, sâbık Kethudâ es-Seyyid el-Hâc Hasan Ağa, Usta Kirak v. Kiragos, Usta Sefer [v.] Asvador, İskican v. Minas, Artin v. Vartan.