İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 235 Hüküm no: 208 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agopcan oğlu Haçador’un, Şerife Ayşe Fitnat Hanım’ın vasisi Ahmed Nureddin Efendi’den aldığı borcunu ikrarı 10.587,5 guruşu sagīre içün vasînin kabz eylediği E‘âzım-ı ricâl-i Devlet-i aliyye’den hâlâ kethudâ-yı âlî câî-i Hazret-i sadr-ı âlî inâyetlü atûfetlü refetlü Mehmed Seyyidâ Efendi hazretlerinin kethudâ-yı âlî-kadrleri hâcegân-ı dîvân-ı hümâyûndan sa‘âdetlü Ahmed Nureddin Efendi b. el-Hâc Mustafa Hilmi Efendi’nin Bâb-ı Âsafî’de kethudâ-yı hazret-i müşârün-ileyh dâirelerinde kâin odasında halâli’s-sutûrda mastûr husûsun ketb ü tahrîri içün cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Mehmed Tâhir Efendi zeyl-i sahîfede mektûbü’l-esâmî Müslimîn huzûrlarında akd-i meclis-i şer‘-i Nebevî ettikde Yenihan sarrâflarından Agopcan oğlu Haçador nâm zimmî meclis-i ma‘kūd-ı mezkûrda Dârü’l-hilâfeti’l-aliyye Kostantıniyyeti’l-mahmiye’de Şeyh Ebulvefâ kurbünde Taştekneler nâm mahâlde Molla Hüsrev mahallesinde sâkin iken bundan akdem vefât eden es-Seyyid el-Hâc İbrahim Ağa b. es-Seyyid Süleyman’ın sulbiye kerîmesi Şerîfe Âişe Fitnat Hanım nâm sagīrenin bâ-hüccet-i şer‘iye vasî-i muhtârı mûmâ-ileyh Ahmed Nureddin Efendi mahzarında ikrâr-ı tam ve takrîr-i kelâm edip mûmâ-ileyh Ahmed Nureddin Efendi’nin vasî-i muhtârı oldukları sagīre-i mezbûre Şerîfe Âişe Fitnat Hanım’ın babası müteveffâ-yı merkūm es-Seyyid el-Hâc İbrahim Ağa’dan mevrûs ber-mûceb-i defter-i müfredât zimem-i nâsda olan hukūkundan vasî-i mûmâ-ileyh es-Seyyid Nureddin Efendi’nin tevkîl ve ihâlesiyle ma‘lûmü’l-esâmî kimesnelerden cem‘an on bin beş yüz seksen yedi buçuk guruşu ben ashâbından ahz ü kabz ve kendi umûruma sarfla istihlâk etmemle ol-vechile meblağ-ı mecmû‘-ı merkūm on bin beş yüz seksen yedi buçuk guruş zimmetimde efendi-i mûmâ-ileyhin vasî-i muhtârı oldukları sagīre-i mezbûre Şerîfe Âişe Fitnat Hanım’a damânen ve sahîhan deynimdir dedikde mukırr-ı sarrâf-ı mesfûr Haçador zimmî vasî-i mûmâ-ileyh Ahmed Nureddin Efendi tahkīk ve tasdîk etmeleriyle vâki‘ hâli kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 11 C sene 1238. Şühûdü’l-hâl: Kethudâ-yı hazret-i sadr-ı âlî kaftancısı Sadık Ağa b. Abdullah, Mühürdâr yamağı İsmail İzzet Ağa b. Mehmed, Asmaaltı’nda Duhânî Mustafa Ağa b. Ali, Kaftânî yamağı Hafız Mehmed Ağa b. Osman ve gayruhum.