İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 239 Hüküm no: 210 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Salih ve Hasan Ağa b. Abdullah’ın mâlik oldukları oda gediklerini Yağcı Hacı Hamza b. Ahmed’e sattıkları Dört bâb oda gediği Mahmiye-i İstanbul’da kâin balmumcu esnâfından İsmail Ağa b. Salih ve Hasan Ağa b. Abdullah nâm kimesneler meclis-i şer‘-i şerîf-i enverde işbu bâ‘isü’l-kitâb Yağcı el-Hâc Hamza b. Ahmed mahzarında her biri ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı dâhilinde kâin Kule Duhânı demekle arîf dört bâb oda tahtında mağazadan ibâret bir bâb sagīr han << derûnunda >> derûnunda vâki‘ ancak zikr olunan dört bâb oda derûnlarında mevcûde beyne’l-esnâf gedik ta‘bîr olunur [50a] akd-i âti’z-zikrin sudûruna değin münâsafaten yedimizde bâ-hüccet-i şer‘iye iştirâken emvâlim olan şehriye sekiz guruş kadîm kirâlı âlât-ı lâzıme-i ma‘lûmemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Hamza Ağa’ya bin üç yüz guruşa bey‘ ve temlik ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin üç yüz guruşu bize def‘ ü teslîm eylediğinde biz dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan dört bâb oda derûnlarında mevcûde gedik ta‘bîr olunan âlât-ı lâzıme-i ma‘lûmelerde bizim kat‘a alâka ve medhalimiz kalmayup merkūm el-Hâc Hamza Ağa’nın mâl-ı müşterâsı ve hakk-ı sırfı olmuşdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 C sene 1238. Şühûdü’l-hâl: Muhzırlar Kethudâsı Hafız İsmail Ağa, Molla Mahmud el-Muhzır, Molla Halil el-Muhzır, Molla Hüseyin el-Muhzır, Molla Osman el-Muhzır ve gayruhum.