İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 239 Hüküm no: 211 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Nikola’nın mâlik olduğu manav gediğini vârislerinin Yusuf Beşe b. Mehmed’e sattıkları Zahîreci manav gediği mübâya‘ası Vilâyet-i Anadolu’da Niğde sancağında vâki‘ Bereketli Ma‘deni kazâsına tâbi‘ Kortanoş karyesinde mütemekkin iken bundan akdem hâlik olan zahîreci manav tâifesinden Anaştaş v. Nikola nâm zimmînin verâseti karye-i mezbûrede mütemekkineler zevce-i metrûkesi Anaşya bt. Mesail Nasrâniye ile sulbiye kebîre kızları Marya ve Despino Nasrâniyelere ve hâlâ mahmiye-i İstanbul’da mütemekkin li-ebeveyn ammi oğlu Peredomoz v. İstefan zimmîye münhasıra ve tashîh-i mîrâsları yirmi dört sehmden olup sihâm-ı mezbûrenin üç sehmi zevcesi mersûmeye ve sekizer sehmi kızları mesfûretândan her birine ve bâkī beş sehmi ammi oğlu mesfûr Peredomoz zimmîye isâbeti tahakkukundan sonra mesfûr Peredomoz zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Manav Yusuf Beşe b. Mehmed mahzarında bi’l-verâse ikrâr tam ve takrîr-i kelâm edip mahmiye-i mezbûrede emti‘a gümrüğü civârında Eminönü nâm mahâlde vâki‘ Kel Hüseyin ve Deli Abdi dükkânları beynlerinde kâin bir bâb zahîre manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle on yedi sehmi âharın ve mâ‘adâ yüz üç sehmi mûrisim hâlik-i mesfûr Anaştaş zimmînin ile’l-helâk yedinde mâlı ve mülkü ve ba‘de helâkihî ber-tashîh-i merkūm gāibât-ı mesfûrât ile bana mevrûs oldukdan sonra ben âlât-ı lâzıme-i mezkûrenin ber-i‘tibâr-ı merkūm yüz üç sehminden beş sehm hisse-i irsiyeme isâbet eden yirmi bir sehm bir pul hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ve şürekâ-i sâirem izinleriyle iki bin guruşa merkūm Manav Yusuf Beşe’ye bi’l-verâse bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde biz dahi yedinden bi’l-verâse tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan yirmi bir sehm bir pul hisse-i şâyi‘ada benim bi’l-verâse kat‘a alâka ve medhalim kalmayup merkūm Manav Yusuf Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 C sene 1238. Şühûdü’l-hâl: Pazarbaşı İbrahim Sârım Bey, Bölükbaşı Musa Yazıcı, Molla Mahmud el-Muhzır.