İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 245 Hüküm no: 217 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Ağa b. Salih’in vârislerinin un değirmenini Mehmed İzzet Ağa b. Derviş Mustafa’ya sattıkları Şehriyeci değirmen mübâya‘asıdır Mahmiye-i İstanbul’da Kapan-ı dakīk kapısı dâhilinde Harâccı Kara Mehmed Bey Mahallesi ahâlisinden olup vilâyet-i Anadolu’da Gemlik kazâsına tâbi‘ Emrudlu karyesinde müsâfiren sâkin iken bundan akdem vefât eden Mehmed Sadık Ağa b. el-Hâc Salih’in verâseti zevce-i menkûha-i metrûkesi Ümmügülsüm Hatun bt. el-Hâc Abdullah ile sulbî sagīr oğulları Abdulkadir ve Ali Latif ve Mehmed Sadık ve sulbiye sagīre kızları Âkıle ve Hayriye’ye münhasıra ve tashîh-i mesele-i mîrâsları altmış dört sehmden olup sihâm-ı mezbûrenin sekiz sehmi zevce-i mezbûreye ve on dörder sehmi oğulları sıgār-ı mezbûrundan her birine ve yedişer sehmi kızları sagīrân-ı mezbûretândan her birine isâbeti tahakkukundan sonra sıgār-ı mezbûrûnun vâlideleri ve tesviye-i emirlerine bâ-hüccet-i şer‘iye ve vasî-i mansûbeleri zevce-i mezbûre Ümmügülsüm Hatun’un vâlidesi ve tarafeynden husûs-ı âti’l-beyânı ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân Na‘lbur el-Hâc Mustafa Ağa b. el-Hâc İbrahim ve Abdullah Efendi b. Feyzullah nâm kimesneler şehâdetleriyle ber-nehc-i şer‘î sâbit olup zâtı ta‘rîf-i şer‘î ile mu‘arrefe olan Hanife Hatun bt. Hasan meclis-i şer‘-i hatîr-i lâzımü’t-tevkīrde mahmiye-i mezbûrede kâin uncu esnâfından işbu bâ‘isü’l-kitâb Mehmed İzzet Ağa b. Derviş Mustafa mahzarında bi’l-vekâle ikrâr-ı tam ve takrîr-i kelâm edip kızım ve müvekkilem zevce-i mezbûre Ümmügülsüm Hatun mahmiye-i mezbûrede Kapan-ı dakīk kurbünde arabacılar nâm mahâlde kâin şehriyeci değirmeni demekle arîf arsasının Arhandapola vakfına mukāta‘a-i kadîmesi olup üzerinde mevcûde bi’l-cümle ebniyesi mülk-i ma‘lûmü’l-hudûd üç horoslu bir bâb uncu değirmeni ancak dört sehm i‘tibâriyle nısfı olan iki sehmi müteveffâ Benli el-Hâc Mustafa veresesinin ve bir sehmi mezbûr Mehmed İzzet Ağa’nın ve bir sehmi ile zikr olunan üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s ve sâir âlât-ı lâzıme-i ma‘lûmeden altı re’s bârgir ve onlara isâbet eden sâir âlât-ı lâzıme-i ma‘lûme merkūm Mehmed İzzet Ağa’nın ve mâ‘adâsı olan altı re’s bârgir ve onlara isâbet eden sâir âlât-ı lâzıme-i ma‘lûme zevcim müteveffâ-yı mezbûr Mehmed Sadık Ağa’nın ile’l-vefât bâ-hüccet-i şer‘iye yedinde mâlı ve mülkü ve ba‘de vefâtihi ber-tashîh-i merkūm benimle vasîleri olan evlâdım sıgār-ı mezbûruna mevrûs oldukdan sonra ben zikr olunan şehriyeci değirmeninin arsası mukāta‘alı mülk olan ebniye-i memlûkesinden ber-i‘tibâr-ı mezkûr benimle vasîleri olduğum evlâdım sıgār-ı mezbûrûna mevrûs olan bir sehm hisse-i şâyi‘amızı mesûğ-ı şer‘îye binâen bi’l-izni’ş-şer‘î ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr mütehakkık olan üç yüz guruşa ve zikr olunan üç horoslu ancak değirmeni derûnunda mevcûde gedik âlât-ı lâzıme-i mezkûresinden zevcim müteveffâ-yı mezbûrun hissesi olup ber-vech-i muharrer benimle sıgār-ı mezbûrûna mevrûs olan altı re’s bârgir ve onlara isâbet eden sâir âlât-ı lâzıme-i ma‘lûmeyi kezâlik ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dört bin sekiz yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bi’l-verâse ve bi’l-vesâye mezbûr Mehmed İzzet Ağa’ya bey‘ ve temlik ve ebniye-i << memlûke >> mezkûre hissesini vech-i lâyıkı üzere âlât-ı lâzıme-i mezkûre hissesiyle ma‘an teslîm eylediğimde ol dahi ber-vech-i muharrer yedimden iştirâ ve temlik ve tesellüm ve kabz ü kabûl ve semenleri olan meblağ-ı mecmû‘-ı mezkûr beş bin yüz guruşu bana def‘ ü teslîm eylediğinde ben dahi yedinden bi’l-verâse ve bi’l-vesâye tamamen ve kâmilen ahz ü kabz ve müteveffâ-yı mezbûrun defter-i kassâmına idhâl edip mebî‘ayn-i mezkûreynin tağrîr ve gabinlerine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-verâse ve bi’l-vesâye kabûlü hâvî ibrâ ve iskāt ve bi’l-vesâye kat‘-ı nizâ‘ dahi etmemizle fîmâ-ba‘d zikr olunan değirmen ebniye-i memlûkesinin dört sehm i‘tibâriyle bir sehmi mukaddemâ ve bir sehmi hâlâ ber-minvâl-i muharrer şirâen ki cem‘an nısfı olan iki sehmi ile gedik ta‘bîr olunur âlât-ı lâzıme-i mezkûreden altı re’s bârgir ve onlara isâbet eden sâir âlât-ı lâzıme-i ma‘lûme mukaddemâ [51b] ve altı re’s bârgir ve onlara isâbet eden sâir âlât-ı lâzıme-i ma‘lûme hâlâ vech-i meşrûh üzere şirâen ki mecmû‘u merkūm Mehmed İzzet Ağa’nın mâlı ve mülkü ve hakk-ı sırfı olup benim ve vasîleri olduğum evlâdım sıgār-ı mezbûrunun kat‘a [alâka] ve medhalimiz kalmamışdır dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 C sene 1238. Şühûdü’l-hâl: Eş-şâhidûne’s-sâbıkūn.