İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 247 Hüküm no: 218 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafıze Hatun bt. Ahmed’in mâlik olduğu un değirmenini oğlu Mehmed Ağa b. İbrahim’e sattığı Hacı Salih değirmeni demekle arîf Mahrûse-i Galata’ya muzâfe kasaba-i Kasımpaşa’da Büyükpiyalepaşa mahallesinde sâkine Hafıze Hatun bt. el-Hâc Ahmed tarafından husûs-ı âti’l-beyânı ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân es-Seyyid İsmail Yazıcı b. es-Seyyid Mehmed Emin ve Uncu Osman Ağa b. Ali nâm kimesneler şehâdetleriyle ber-nehc-i şer‘î sâbit olan el-Hâc Süleyman Ağa b. Mahmud nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin sadrî kebîr oğlu hâlâ uncular kethudâsı işbu bâ‘isü’l-kitâb el-Hâc Mehmed Ağa b. el-Hâc İbrahim mahzarında bi’l-vekâle ikrâr-ı tam ve takrîr-i kelâm edip müvekkilem mezbûre Hafıze Hatun zikr olunan kasaba-i Kasımpaşa’da Cum‘apazarı nâm mahâlde vâki‘ Hacı Salih değirmeni demekle arîf ma‘lûmü’l-hudûd dört horoslu bir bâb uncu değirmeni derûnunda mevcûde beyne’l-hıref gedik ta‘bîr olunur on altı re’s bârgir ve sâir âlât-ı lâzıme-i ma‘lûmeden on üç re’s bârgir ve onlara isâbet eden sâir âlât-ı lâzıme-i ma‘lûme oğlum mezbûr el-Hâc Mehmed Ağa’nın mâlı olmağla mâ‘adâsı olup akd-i âtiyyü’z-zikrin sudûruna değin yedimde mâlım ve mülküm olan üç re’s bârgir ve onlara isâbet eden sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin beş yüz guruşa oğlum mezbûr el-Hâc Mehmed Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup bâlâda zikr olunduğu üzere on üç re’s bârgir ve onlara isâbet eden sâir âlât-ı lâzıme-i mezkûre mukaddemâ ve üç re’s bârgir ve onlara isâbet eden sâir âlât-ı lâzıme-i ma‘lûme hâlâ ber-minvâl-i muharrer şirâen ki mecmû‘u oğlum mezbûr el-Hâc Mehmed Ağa’nın mâlı ve mülkü ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i C sene 1238. Şühûdü’l-hâl: Eş-şâhidûne’s-sâbıkūn.