İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 247 Hüküm no: 219 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peredomoz v. İsak’ın sabuncu gediğini Ahmed Ağa b. Ali’ye sattığı Sabuncu gediği Mahmiye-i İstanbul’da kâin sabuncu esnâfından Peredomoz v. İsak nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb el-Hâc Ahmed Ağa b. Ali nâm kimesne mahzarında ikrâr-ı tam ve takrîr-i kelâm edip mahmiye-i mezbûrede ketancılar başında helvacı kapısı civârında kâin yağlıkçı ve enfiyeci dükkânları beynlerinde vâki‘ ma‘lûmü’l-hudûd bir bâb sabuncu dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi merkūm el-Hâc Ahmed Ağa’nın mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile dört bin yedi yüz elli guruşa merkūm el-Hâc Ahmed Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl edip semeni olan meblağ-ı merkūm dört bin yedi yüz elli guruşun << bana def‘ ü teslîm ben dahi yedinden >> bin beş yüz seksen beş guruşu cihet-i karz-ı şer‘îden merkūm el-Hâc Ahmed Ağa’ya zimmetimde deynim olan bin beş yüz seksen beş guruşa takas ve mahsûb eylediğimde ol dahi mukasa ve kabûl ettikden sonra semen-i merkūmun mâ‘adâsı olan üç bin yüz altmış beş guruşunu dahi bana def‘ ü teslîm eylediğinden ben dahi yedinden ahz ü kabz etmemle ol-vechile semen-i merkūmdan mezbûr el-Hâc Ahmed Ağa zimmetinde bir akçe ve bir habbe hakkım kalmayup mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan sabuncu dükkânı derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı merkūm altmış sehmi mukaddemâ ve altmış sehmi hâlâ ber-minvâl-i muharrer şirâen ki mecmû‘u mezbûr el-Hâc Ahmed Ağa’nın mâlı ve mülkü ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî selh-i C sene [1]238. Şühûdü’l-hâl: Kethudâ es-Seyyid el-Hâc İbrahim Ağa b. Ahmed, es-Seyyid Mehmed Emin Ağa b. es-Seyyid Ömer, Molla Salih el-Muhzır, Molla Halil el-Muhzır, Molla Mahmud el-Muhzır, Öksüzoğlu es-Seyyid Ahmed Ağa [b.] es-Seyyid Hasan, es-Seyyid Mustafa Ağa b. es-Seyyid Abdurrahman, Marat v. Lefter, Sava v. Tanaş, Esbir v. Kiryako.