İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 248 Hüküm no: 220 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öksüzoğlu Seyyid Ahmed Ağa b. Hasan’ın sabun tablası gediğini Mehmed Emin Ağa b. Ömer’e rehin bıraktığı Sabun tablası gediğini rehin Mahmiye-i İstanbul’da kâin sabuncu esnâfından Öksüzoğlu es-Seyyid Ahmed Ağa b. es-Seyyid Hasan nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb es-Seyyid Mehmed Emin Ağa b. Ömer nâm kimesne mahzarında ikrâr-ı tam ve takrîr-i kelâm edip mezbûr es-Seyyid Mehmed Emin Ağa mâlından bana iki bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk etmemle meblağ-ı mezbûr iki bin guruş zimmetimde mezbûr Seyyid Mehmed Emin Ağa’ya vâcibü’l-edâ ve lâzımü’l-kazâ sahîhan deynim olup mukābelesinde yedimde mâlım ve mülküm olan mahmiye-i İstanbul’da Yenicâmi‘-i şerîfi havlısında mevzû‘ üzerine sabun vaz‘ olunup ibâdullâha narh-ı cârîsi üzere [52a] bey‘a mezûn olduğum bir kıt‘a sabun tablası ve bir terâzî ma‘a derâhim ve bir kantar ve bir çekmece ve bir akçe tahtası ve sâir âlât-ı lâzıme-i ma‘lûmemi mezbûr es-Seyyid Mehmed Emin Ağa’ya rehin vaz‘ ve teslîm eylediğimde ol dahi ber-vech-i muharrer irtihân ve kabz ve kabûl eyledikden sonra yine âlât-ı lâzıme-i muharrere-i mezkûreyi bana i‘âre ve teslîm ben dahi isti‘âre ve kabz etmemle ol-vechile âlât-ı muharrere-i mezkûre yedimde âriyetdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî selh-i C sene 1238. Şühûdü’l-hâl: Kethudâ es-Seyyid el-Hâc İbrahim, Muhzır Molla Halil, Muhzır Molla Halil [Mahmud].