İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 249 Hüküm no: 221 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer Ağa b. İsmail’in vârislerinin sabun tablası gediği davasında Öksüzoğlu Seyyid Ahmed Ağa b. Hasan’ın zimmetini ibra ettikleri ve rehniyetin kalktığı Sabun tablası fekki Asl-ı târih-i hüccet fî 8 Ş sene [12]37. Derûn-ı hüccetde ismi mezkûr sabuncu esnâfından es-Seyyid Ömer Ağa b. İsmail fevt olmağla verâseti min-ciheti’l-usûbe li-eb er karındaşı oğulları es-Seyyid İbrahim Edhem ve es-Seyyid Mustafa veledey Kasım’a münhasıra olduğu şer‘an zâhir ve mütehakkık oldukdan sonra mezbûrân es-Seyyid İbrahim Edhem ve es-Seyyid Mustafa meclis-i şer‘-i enverde esnâf-ı merkūmede kezâlik derûn-ı hüccetde ismi mezkûr işbu bâ‘isü’l-kitâb Öksüzoğlu es-Seyyid Ahmed Ağa b. es-Seyyid Hasan nâm kimesne mahzarında her biri bi’l-verâse ikrâr-ı tam ve takrîr-i kelâm edip mûrisim ammimiz müteveffâ-yı mezbûr Seyyid Ömer Ağa’nın derûn-ı hüccetde tahrîr olunduğu üzere mahmiye-i İstanbul’da Yenicâmi‘-i şerîfi havlısında mevzû‘ üzerine sabun vaz‘ olunup ibâdullâha bey‘ olunan bir kıt‘a sabun tablası ve bir terâzî ma‘a derâhim ve bir kantar ve bir çekmece ve bir akçe tahtası ve sâir âlât-ı lâzıme-i ma‘lûme rehniyetle mezbûr Öksüzoğlu es-Seyyid Ahmed Ağa zimmetinde cihet-i karz-ı şer‘îden bin beş yüz guruş ve bilâ-rehn kezâlik cihet-i karzdan beş yüz guruş ki cem‘an iki bin guruş alacak hakkı olup kable’l-ahz ve’l-fekk fevt oldukda meblağ-ı mecmû‘-ı mezkûr bize mevrûs oldukdan sonra mezbûr Öksüzoğlu es-Seyyid Ahmed Ağa meblağ-ı mecmû‘-ı merkūm iki bin guruşu bize tamamen edâ ve teslîm eylediğinde biz dahi yedinden bi’l-verâse tamamen ve kâmilen ahz ü kabz ve beynimizde iktisâm ve mukābelesinde rehin olan sabuncu tablası ve âlât-ı mezkûreyi ba‘de’l-kabz bi’l-verâse rehniyetden fekk ve yine mezbûr Özsüz[oğlu] es-Seyyid Ahmed Ağa’ya redd ü teslîm etmemizle fîmâ-ba‘d meblağ-ı mecmû‘-ı mezkûr iki bin guruşdan mezbûr Öksüzoğlu es-Seyyid Ahmed Ağa zimmetinde müteveffâ-yı mezbûrun ve bi’l-verâse bizim bir akçe ve bir habbe hakkımız ve alacağımız ve zikr olunan tabla ve âlât-ı lâzımede kat‘a alâka ve medhalimiz kalmayup kemâ-fi’s-sâbık mezbûr Öksüzoğlu es-Seyyid Ahmed Ağa’nın mâlı ve mülküdür dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî selh-i C sene 1238. Şühûdü’l-hâl: Eş-şâhidûne’s-sâbıkūn.