İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 250 Hüküm no: 222 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Manol’un havyarcı bakkal dükkânı gediğini borcuna karşılık Hadice Hatun bt. Mehmed Said’e rehin bıraktığı Havyarcı bakkāl gediği idânesi Mahmiye-i İstanbul’da havyarcı bakkāl tâifesinden Nikola v. Manol nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede Uzunçarşı kurbünde Bezzâz-ı cedîd mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-kitâb Hadice Hatun bt. Mehmed Said mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Balık Pazarı Kapısı hâricinde vâki‘ Moskov dükkânı demekle arîf ma‘lûmü’l-hudûd bir bâb havyarcı bakkāl dükkânı derûnunda mevcûde beyne’l-esnâf gedik ta‘bîr olunur bir terâzî ma‘a derâhim ve bir kantar ve beş fıçı ve sâir âlât-ı lâzıme-i ma‘lûmeden yüz yirmi sehm i‘tibâriyle bâ-hüccet-i şer‘iye yedimde mâlım ve mülküm olan beş sehm hisse-i şâyi‘amı mezbûre Hadice Hatun’a zikri âtî bana ikrâz edeceği meblağ mukābelesinde rehin vaz‘ ve vech-i lâyıkı üzere teslîm eylediğimde ol dahi yedinden irtihân ve tesellüm ve kabz ü kabûl ettikden sonra yine bana i‘âre ve teslîm ben dahi âriyeten ba‘de’l-kabz mezbûre Hadice mâlından bana iki bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semenleri işbu târih-i kitâbdan iki sene tamamına değin müeccel ve mev‘ûd yine mezbûre Hadice Hatun’un mâlından ve yedinden iştirâ ve kabz eylediğim bir hilâlî sâ‘at ve bir bolyenli semmûr kürk semenlerinden dahi altı yüz guruş ki cem‘an iki bin altı yüz guruş zimmetimde mezbûre Hadice Hatun’a vâcibü’l-edâ deynim olup zikr olunan âlât-ı lâzımenin ber-i‘tibâr-ı mezkûr beş sehmi yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 28 C sene 1238. Şühûdü’l-hâl: Pazarbaşı Süleyman Ağa b. Ömer, Bölükbaşı Abdi, Kâtib Ahmed Efendi, Yazıcı Eftat v. Mavriyanos, İlya v. Peredomoz, Çakıroğlu Yorgi v. İstavriyanos, Mihal v. Manoyel.