Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 336 Hüküm no: 368 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murtaza Bey b. Ahmed’in Hacı Hüseyin Ağa b. Mustafa’da olan alacağını terekesinden alması Saray-ı atîk-i sultânî’de anbarcı olan bâ‘isü hâze’l-kitâb Murtaza Bey b. Ahmed nâm kimesne meclis-i şer‘-i şerîf-i enverde bin doksan altı senesinde sakabaşı iken Bedr-i Huneyn’de vefât eden Dalkozlu el-Hâc Hüseyin Ağa b. Mustafa b. Hüseyin’in li üm karındaşları ve terekesine vaz‘-ı yed eden Âsiye ve Fâtıma taraflarından husûs-ı âti’l-beyâna vekîl-i müseccelleri olan Ali Efendi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûr zimmetinde cihet-i karz-ı şer‘îden yüz yetmiş esedî guruş hakkım olup hattâ ikrâr dahi ettiğinden sonra kable’l-edâ vefât etmekle suâl olunup terekesinden edâya tenbîh olunmak matlûbumdur dedikde gıbbe’s-suâl vekîl-i merkūm cevâbında müvekkilelerinin tereke-i müteveffâ-yı merkūma vaz‘-ı yedlerini ikrâr lâkin deyn-i mezkûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup saray-ı mezkûr ahâlîsinden el-Hâc Mehmed b. Bayram ve Mustafa Bey b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr el-Hâc Hüseyin Ağa b. Mustafa b. Hüseyin bundan akdem hayâtında işbu müdde‘î-i mezbûr Murtaza Bey’e cihet-i karzdan yüz yetmiş esedî guruş vâcibü’l-edâ deynimdir deyû bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i merkūm tahlîf-i şer‘î ile [tahlîf] olundukdan sonra mûcebiyle meblağ-ı mezbûr yüz yetmiş guruş müteveffâ-yı mezbûrun terekesinden müdde‘î-i mezbûra edâ ve teslîme ba‘de’t-tenbîh mâ vaka‘a bi’t-taleb ketb olundu. Fi’l-yevmi’l-hâmis min Recebi’l-ferd li sene seb‘a ve tis‘în ve elf. Şuhûdü’l-hâl: Mustafa Bey b. Osman, İbrahim b. Ahmed, el-Hâc Hasan b. İbrahim, Mustafa Çelebi Ser-muhzırân ve gayruhüm.