İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 251 Hüküm no: 223 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Atam’ın bakkal dükkânını Petro v. Kostandi’ye sattığı Bakkāl Mahmiye-i İstanbul’da kâin bakkāl esnâfından Hıristo v. Atam nâm zimmî meclis-i şer‘-i şerîf-i enverde esnâf-ı mezkûreden işbu hâmilü’r-rakīm Petro v. Kostandi nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede Samatya kurbünde Ağa hamamı nâm mahâlde kâin Ali Ağa dükkânı demekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan sehmi âharın ve mâ‘adâsı olup akd-i âti’z-zikrin sudûruna [değin] benim yedimde mâlım ve mülküm olan otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîkim izin ve icâzetleri ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle dört yüz guruşa mersûm Petro zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d otuz sehm hisse-i şâyi‘ada benim kat‘a alâka ve medhalim kalmayup mersûm Petro zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 C sene 1238. Şühûdü’l-hâl: Eş-şâhidûne’s-sâbıkūn.