İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 251 Hüküm no: 224 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Mehmed’in vârislerinden Şerife Saliha Hatun bt. Mustafa’nın iki bâb bakkal dükkânını Şerife Tevhide Hatun bt. Seyyid Ali’ye sattığı İki bâb bakkāl Mahmiye-i İstanbul’da Gül Câmi‘-i şerîfi mahallesinde Yelkenci es-Seyyid Mehmed Ağa’nın menzilinde müsâfireten sâkine iken bundan akdem vefât eden Rukiye Hatun bt. Mehmed’in li-ebeveyn hâlesi kızı ve zât-ı rahm cihetinden hasren vârisesi Şerîfe Saliha Hatun bt. Mustafa tarafından husûs-ı âti’l-beyânı ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân es-Seyyid Ahmed Efendi b. Mehmed ve es-Seyyid Abdüllatif Efendi b. Mehmed nâm kimesneler şehâdetleriyle ber-nehc-i şer‘î sâbit olan es-Seyyid Ahmed Halim Efendi b. el-Hâc Mustafa ve müteveffât-ı mezbûrenin sülüs malını vesâyâ-yı mu‘ayyene ve gayr-ı mu‘ayyene tenfîze vasî-i muhtâresi olan Rabia Hatun bt. Halil tarafından [52b] kezâlik husûs-ı âti’l-beyânı ikrâra vekîl olduğu zâtını ârifân şâhidân-ı mezbûrân şehâdetleriyle ber-nehc-i şer‘î sâbit olan es-Seyyid Abdülhamid Ağa b. es-Seyyid Ahmed meclis-i şer‘-i hatîr-i lâzımü’t-tevkīrde vârise-i müvekkile-i mezbûre Şerîfe Saliha Hatun’un kızının kızı olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Şerîfe Tevhide Hatun bt. es-Seyyid Ali mahzarında her biri bi’l-vekâle ikrâr-ı tam ve takrîr-i kelâm edip müvekkilelerimiz mezbûretân Şerîfe Saliha Hatun ve Rabia Hatun mahmiye-i mezbûre hısnı ebvâbından Ayakapısı hâricinde kenîse karşısında vâki‘ bostancıbaşı dükkânı demekle arîf bir bâb ve kurbünde kâin Papasoğlu dükkânı demekle ma‘rûf diğer bir bâb ki cem‘an ma‘lûmü’l-hudûd ve iki bâb bakkāl dükkânları derûnlarında mevcûde kezâlik âlât-ı lâzıme-i ma‘lûmelerin her biri yüz yirmişer sehm i‘tibâriyle yüzer sehmi âharların ve yirmişer sehmi müteveffât-ı mezbûrenin ile’l-vefât yedinde mâlı ve mülkü ve ba‘de vefâtiha sülüs-i vesâyâsına isâbet ve bana mevrûs olmağla biz zikr olunan iki bâb bakkāl dükkânları âlât-ı lâzıme-i mezkûrelerinden ber-i‘tibâr-ı mezkûr her birinden yirmişer sehmi semen-i misilleri idüğü bi’l-ihbâr zâhir ve mütehakkık olan dörder yüz guruşdan cem‘an sekiz yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkleri izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mezbûre Şerîfe Tevhide Hatun’a bi’l-verâse ve bi’l-vesâye bey‘ ve temlik ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl ve semenleri olan meblağ-ı mecmû‘-ı merkūm sekiz yüz guruşu bize tamamen def‘ ü teslîm eylediğinde biz dahi yedinden tamamen ahz ü kabz ve müteveffât-ı mezbûrenin defter-i kassâmına idhâl edip mebî‘ayn-i mezkûreynin tağrîr ve gabinlerine müte‘allika âmme-i da‘vâdan her birimiz âharın zimmetini kabûlü hâvî bi’l-verâse ve bi’l-asâle ibrâ ve iskāt ve bi’l-vesâye kat‘-ı nizâ‘ dahi etmemizle fîmâ-ba‘d âlât-ı lâzıme-i mezkûrelerin ber-i‘tibâr-ı merkūm yirmişer sehmlerinde bizim verâseten ve vesâyeten kat‘a alâka ve medhalimiz kalmayup mezbûre Şerîfe Tevhide Hatun’un emvâl-i müşterâtı ve hakk-ı sırfı olmuşdur dediler dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 C sene 1238. Şühûdü’l-hâl: Eş-şâhidûne’s-sâbıkūn.