İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 257 Hüküm no: 230 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Pavli’nin ibrişim bükücü destgâhını borcuna karşılık Veliyüddin b. Mustafa’ya rehin bıraktığı İbrişim bükücü Asl-ı târih-i hüccet fî 26 C sene [12]34 kassâmda olmuşdur. Derûn-ı hüccette ismi mastûr mahmiye-i İstanbul’da kâin ibrişim bükücü esnâfından Yako v. Pavli nâm zimmî meclis-i şer‘-i şerîf-i enverde mahmiye-i mezbûrede Altımermer kurbünde Küçükhamam nâm mahâlde sâkin bâ‘isü’l-kitâb Veliyüddin b. Mustafa nâm kimesne mahzarında ikrâr-ı tam ve takrîr-i kelâm edip mezbûr Veliyüddin Ağa mâlından bana dört yüz guruş ikrâz ve teslîm ben dahi yedinden iktirâz ve kabz ve kendi umûruma sarfla istihlâk edip meblağ-ı merkūm ile semeni işbu târih-i hâmişten iki sene tamamına değin müeccel ve mev‘ûd yine mezbûr Veliyüddin Ağa’nın mâlından ve yedinden iştirâ ve kabz eylediğim bir hilâlî sâ‘at semeninden dahi doksan altı guruş ki cem‘an dört yüz doksan altı guruş zimmetimde mezbûr Veliyüddin Ağa’ya edâsı vâcib deynim olup meblağ-ı mecmû‘-ı mezkûr mukābelesinde mahmiye-i mezbûrede Fazlıpaşa Sarayında Kule ta‘bîr olunur mahâlde kâin derûn-ı hüccetde tahrîr olunduğu üzere yedimde mâlım ve mülküm olan bir aded mükemmel ibrişim bükücü destgâhımı rehin vaz‘ ve mezbûr Veliyüddin Ağa’ya teslîm eylediğimde ol dahi irtihân ve tesellüm ve kabz ü kabûl eyledikden sonra zikr olunan destgâhımı yine bana i‘âre ve teslîm ben dahi isti‘âre ve kabz etmemle yedimde âriyet olup eğer deynim olan meblağ-ı mecmû‘-ı mezkûr dört yüz doksan altı guruşu işbu târih-i hâmişten iki sene tamamına değin benim içün edâ müesser olmaz ise sâlifü’z-zikr rehin olan destgâhımı semen-i misliyle âhara bey‘le ve semenini kabza ve makbûzundan meblağ-ı mezbûru ba‘de’l-istifâ zuhûr eder ise bana teslîme tarafımdan mezbûr Veliyüddin Ağa’yı akd-i rehinde meşrûten azl ü in‘izâlden masûne küllemâ azeltüke fe-ente vekîlî mefhûmu üzere vekâlet-i devriye ile vekîl ve nâib-i menâb nasb ü ta‘yîn eylediğimde ol dahi vekâlet-i merkūmeyi kabûl eyledi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 Receb sene 1238. Şühûdü’l-hâl: Kethudâ Abdüllatif Ağa, Yiğitbaşı Molla Mehmed, Bükücü Mehmed Usta, Bükücü Abdi Usta, Yiğitbaşı Begos v. Kirkor, Sandalcı Pandeli v. Kosti.