İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 257 Hüküm no: 231 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Ağa b. Mehmed’in, İsmail Ağa b. Ali’ye borcunu ödeyerek rehin bıraktığı evini geri aldığı Menzili icrâdan fek bi-tarîki’l-istiğlal Asl-ı târih-i hüccet fî 5 Ca sene [12]38 kassâmda olmuşdur. Derûn-ı hüccetde ismi mezkûr zu‘emâdan el-Hâc İsmail Ağa b. el-Hâc Ali meclis-i şer‘-i hatîr-i lâzımü’t-tevkīrde kezâlik derûn-ı hüccetde mezkûrü’l-ism zu‘emâdan İbrahim Edhem Ağa b. Mehmed mahzarında ikrâr-ı tam ve takrîr-i kelâm edip mahmiye-i İstanbul’da Yenibahçe kurbünde Kapdan Sinan mahallesinde vâki‘ bir tarafdan Bezzâzistânî Ali Ağa menzili ve bir tarafdan Hakkāk Osman Efendi menzili ve bir tarafdan Humbaracı İsmail Ağa menzili ve iki tarafdan tarîk-i âm ile mahdûd müştemilât-ı ma‘lûmeyi hâvî derûn-ı hüccetde tahrîr olunan bir bâb menzil mukaddemâ mezbûr İbrahim Edhem Ağa’nın yedinde mâlı ve mülkü iken mâlımdan ve yedimden iktirâz ve kabz eylediği bin beş yüz guruş mukābilinde bi-tarîki’l-istiğlal bana vefâen bey‘ ve teslîm ben dahi iştirâ ve kabz ve ba‘de’t-tahliye ve’t-tekābuz derûn-ı hüccetde muharrer ücret ile mezbûra îcâr etmişdim el-hâletü hâzihî mezbûr İbrahim Edhem Ağa meblağ-ı mezbûr bin beş yüz guruşu bana edâ ve teslîm ben dahi yedinden ahz ü kabz ve menzil-i mezkûru fekk etmemle fîmâ-ba‘d meblağ-ı mezbûr bin beş yüz guruşdan mezbûr İbrahim Edhem Ağa zimmetinde bir akçe ve bir habbe hakkım ve menzil-i mezkûrda kat‘a alâka ve medhalim kalmayup menzil-i mahdûd-ı mezkûr kemâ-fi’s-sâbık mezbûr İbrahim Edhem Ağa’nın malı ve mülküdür keyfe mâ yeşâ ve yahtâr mutasarrıf olsun dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 B sene 1238. Şühûdü’l-hâl: Abdullah Efendi, es-Seyyid Ahmed Efendi, Mehmed Ağa b. Halil, Zenneci el-Hâc Hafız Ahmed, es-Seyyid Mehmed Emin Efendi.