İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 258 Hüküm no: 232 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Ağa b. Mehmed’in menzilini Şerif Hafıze Hatun bt. Hasan’a sattığı Menzil mübâya‘asıdır 3.000 guruşa Mahmiye-i İstanbul’da Yenibahçe kurbünde Kapdan Sinanpaşa mahallesinde sâkin zu‘emâdan İbrahim Edhem Ağa b. Mehmed nâm kimesne meclis-i şer‘-i şerîf-i enverde bâ‘isetü’l-kitâb Şerîf Hafıze Hatun bt. Hasan tarafından husûs-ı âti’l-beyânı tasdîka vekîl-i şer‘îsi el-Hâc Hasan Efendi b. Hüseyin nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye silk-i mülk-i sahîhimde münselik olan mahmiye-i İstanbul’da Yenibahçe kurbünde Kapdan Sinanpaşa mahallesinde vâki‘ bir tarafdan Bezzâzistânî es-Seyyid Ali menzili ve bir tarafdan Hakkāk Osman Efendi menzili ve bir tarafdan Humbaracı İsmail Ağa menzili ve iki tarafdan tarîk-i âm ile mahdûd dâhiliyede tabaka-i ulyâda üç bâb oda ve bir divanhâne ve bir âbdesthâne ve bir kenîf ve tabaka-i vustâda iki bâb oda ve bir divanhâne ve bir âbdesthâne ve bir kenîf ve tabaka-i süflâda bir matbah ve bir mikdâr havlu ve bir bi’r-i mâ ve hâriciyede tabaka-i ulyâda bir bâb oda ve bir sofa ve bir mabeyn kapısı ve tabaka-i vustâda iki bâb oda ve bir mikdâr sofa ve bir âbdesthâne ve bir kenîf ve tabaka-i süflâda bir mikdâr havlu ve bir ahır ve bir bi’r-i mâ ve sokak kapısını ve müştemilât-ı sâir-i ma‘lûmeyi hâvî bir bâb mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-mürâfık tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile üç bin guruşa müvekkile-i mezbûre Şerîfe Hafıze Hatun’a bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile [54a] kabülü hâvî ibrâ ve iskāt dahi etmemizle fîmâ-ba‘d menzil-i mahdûd-ı mezkûrda benim aslâ ve kat‘a alâka ve medhalim kalmayup müvekkile-i mezbûre Şerîfe Hafize Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 7 Receb sene 1238. Şühûdü’l-hâl: İmâm el-Hâc Osman Efendi, Zu‘emâdan el-Hâc İsmail Efendi, Mehmed Efendi b. Halil, Zenneci el-Hâc Hafız Ahmed Efendi, es-Seyyid Mehmed Emin Efendi, es-Seyyid Ahmed Efendi, Abdullah Efendi b. Halil.