İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 259 Hüküm no: 233 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdisar v. Şahnatar’ın hoşafçı ve işkenbeci dükkânını Kostandi v. Nikola’ya sattığı Hasköy’de aşçı Mahmiye-i İstanbul’da kâin aşçı ve hoşâbcı ve çevrenci ve işkenbeci esnâfından Bağdisar v. Şahnatar nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Kostandi v. Nikola nâm zimmî muvâcehesinde ikrâr-ı tam ve takrîr-i kelâm edip Havâss-ı Refî‘a kazâsına tâbi‘ kasaba-i Hasköy’de Kalcıoğlu iskelesinden vâki‘ tarafeyni manav ve kahveci dükkânları ve tarafeyni tarîk-i âm ile mahdûd bir bâb aşçı ve hoşâbçı ve çevrenci ve işkenbeci dükkânı derûnunda mevcûde beyne’l-hıref gedik ta‘bîr olunur iki tencere ve iki batya ve iki kefkir ve iki kefçe ve bir işkenbe kazganı ve elli şiş ve üç karavana ve bir peştahta ve bir akçe tahtası ve sâir âlât-ı lâzıme-i ma‘lûmenin yüz yirmi sehm i‘tibâriyle altmış sehm hisse-i şâyi‘ası gāibe ani’l-meclis Alacacı İsak zimmînin yedinde mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim gāib-i mesfûrun izin ve icâzetiyle mersûm Kostandi zimmîye bin üç yüz on beş guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin üç yüz on beş guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan dükkân derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup altmış sehm hisse-i şâyi‘a-i mezkûre mersûm Kostandi [zimmînin] mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 B sene 1238. Şühûdü’l-hâl: Kethudâ Hüseyin Ağa, Yiğitbaşı Ali Usta, Yazıcı Mehmed Eşref Efendi, Mütevellî Mehmed Emin Efendi, Sâbık Kethudâ el-Hâc Hasan Ağa, Usta Keres v. ( ), Usta Bağdisar v. ( ), Tütüncü İstefan v. ( ), Osyan v. ( ).