İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 260 Hüküm no: 234 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Raşid Ağa b. Hatibzade Seyyid Mustafa Ağa’nın un değirmenini Seyyid Şahin Ali Ağa b. Hatibzade Hasan Ağa’ya sattığı Uncu Mahmiye-i İstanbul’da kâin uncu esnâfından es-Seyyid Mehmed Râşid Ağa b. Hatîbzâde es-Seyyid Mustafa Ağa meclis-i şer‘-i hatîr-i lâzımü’t-tevkīrde li-ebeveyn ammizâdesi işbu bâ‘isü’l-kitâb es-Seyyid Şahin Ali Ağa b. Hatîbzâde es-Seyyid el-Hâc Hasan Ağa mahzarında ikrâr-ı tam ve takrîr-i kelâm edip mahmiye-i mezbûrede Cebb-i Ali kapısı dâhilinde vâki‘ Çıngıraklı değirmen demekle arîf dört horoslu bir bâb uncu değirmeninden müfrez hâlâ iki horoslu müstakıllen bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûme âharın mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan dört re’s bârgir ve onlara isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim izin ve icâzetiyle dört bin beş yüz guruşa mezbûr es-Seyyid Şahin Ali Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin beş yüz guruşun bin altı yüz guruşunu değirmen-i mezkûru i‘mâl eylediğim müddetde iştirâ ve kabz eylediğim zehâir-i ma‘lûme semenlerinden cânib-i mîrîye zimmetimde deynim olan ol-mikdâr guruşa mahsûben kabza memûra edâ etmek üzere emir eylediğimde ber-vech-i muharrer edâya ta‘ahhüd ve bâkīsi olan iki bin dokuz yüz guruşunu bana def‘ ü teslîm eylediğinde ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan uncu değirmeni âlât-ı lâzıme-i ma‘lûmesinden dört re’s bârgir ve onlara isâbet [eden] sâir âlât-ı lâzıme-i ma‘lûmede benim kat‘a alâka ve medhalim kalmayup mezbûr es-Seyyid Şahin Ali Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 B sene 1238. Şühûdü’l-hâl: Uncular Kethudâsı el-Hâc Mehmed Ağa b. el-Hâc İbrahim, es-Seyyid el-Hâc Veliyüddin Ağa, Çetecizâde es-Seyyid İbrahim Ağa, Bağdâdîzâde İbrahim b. el-Hâc Mehmed Emin, Uncu Osman Ağa, Mehmed İzzet Ağa, Ahmed Ağa.