İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 261 Hüküm no: 235 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatibzade Seyyid Hasan Ağa b. Ali’nin un değirmenini oğlu Mehmed Ferhad Ağa’ya sattığı Uncu Mahmiye-i İstanbul’da kâin Kapan-ı dakīk tüccârından Hatibzâde es-Seyyid el-Hâc Hasan Ağa b. Ali meclis-i şerîf-i şerîf-i enverde sulbî kebîr oğlu bâ‘isü’l-kitâb es-Seyyid el-Hâc Mehmed Ferhad Ağa tarafından husûs-ı âti’l-beyânda tasdîka vekîl-i şer‘îsi diğer sulbî kebîr oğlu es-Seyyid Şahin Ali Ağa mahzarında ikrâr-ı tam ve takrîr-i kelâm edip mahmiye-i mezbûrede Cebb-i Ali kapısı dâhilinde vâki‘ Çıngıraklı değirmen demekle ma‘rûf dört horoslu bir bâb uncu değirmeninden müfrez hâlâ iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur [54b] sekiz re’s bârgir ve sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûme oğlum vekîl-i mezbûr es-Seyyid Şahin Ali Ağa’nın mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan dört re’s bârgir ve onlara isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim oğlum vekîl-i mezbûrun izin ve icâzetiyle dört bin beş yüz guruşa oğlum müvekkil-i mezbûr el-Hâc Mehmed Ferhad Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl edip semeni olan meblağ-ı merkūm dört bin beş yüz guruş mutâlebesine müte‘allika âmme-i da‘vâdan ibrâ-i âmm-ı sahîh-i şer‘î ile oğlum müvekkil-i merkūm es-Seyyid el-Hâc Mehmed Ferhad Ağa’nın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan uncu değirmeni âlât-ı lâzıme-i ma‘lûmesinden dört re’s bârgir ve onlara isâbet eden sâir âlât-ı lâzıme-i ma‘lûmede benim kat‘a alâka ve medhalim kalmayup oğlum müvekkil-i mezbûr es-Seyyid el-Hâc Mehmed Ferhad Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 B sene 1238. Şühûdü’l-hâl: Eş-şâhidûne’s-sâbıkūn.