İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 266 Hüküm no: 242 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Yusuf’un kadayıfçı dükkânı yarım hissesini Ali Usta b. Ahmed’e sattığı Draman’da kadayıf Mahmiye-i İstanbul’da kâin kadayıfçı esnâfından el-Hâc Ali b. Yusuf nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb diğer Ali Usta b. Ahmed nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Draman kurbünde Tîhtâb hamamı ittisâlinde vâki‘ ma‘lûmü’l-hudûd bir bâb kadayıfçı ve lokmacı dükkânı derûnunda mevcûde beyne’l-esnâf << fından >> gedik ta‘bîr olunur âlât-ı lâzıme-i ma‘lûmenin nısfı gāib ani’l-meclis Ahmed Çavuş nâm kimesnenin mâlı ve mülkü olmağın mâ‘adâsı olup akd-i âti’z-zikrin sudûruna değin ancak benim yedimde mâlım ve mülküm olan nısf-ı âharını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim mezbûrun izin ve icâzetiyle altı yüz guruşa mezbûr diğer Ali Usta’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm altı yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan kadayıfçı ve lokmacı dükkânı derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup nısfı mukaddemâ gāib-i mezbûr Ahmed Çavuş’un mâlı olmağla nısf-ı âharı dahi ber-vech-i muharrer mezbûr diğer Ali Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 19 B sene 1238. Şühûdü’l-hâl: Çörekçiler Kethudâsı İbrahim Ağa b. Mustafa, Muhzır Molla Mahmud b. Mahmud, Yazıcı Ali Efendi b. Süleyman, Molla Halil el-Muhzır, Yiğitbaşı Mehmed Usta b. Osman, Muhzır Molla Hüseyin b. Yusuf.