İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 267 Hüküm no: 243 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mehmed’in bakkal dükkânını Anaştaş v. Todori, Aci Yordan v. Menayil ve Yakut v. Kostandi’ye sattığı Bakkāl Mahmiye-i İstanbul’da kâin bakkāl esnâfından Halil b. Mehmed nâm kimesne meclis-i şer‘-i şerîf-i enverde esnâf-ı merkūmeden işbu hâmilü’r-rakīm Anaştaş v. Todori ve Aci Yordan v. Menayil ve Yakut v. Kostandi nâm zimmîler muvâcehelerinde ikrâr-ı tam ve takrîr-i kelâm edip mahmiye-i İstanbul’da Kocamustafapaşa kurbünde Çınardibi nâm mahâlde kâin Hızır Bey dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde emvâlim olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle mesfûrûn Anaştaş ve Aci Yordan ve Yakut zimmîlere bin yüz guruşa ale’l-iştirâki’s-seviyy bey‘ ve temlik ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ü kabûl ve semeni olan meblağ-ı merkūm bin yüz guruşu bana def‘ ü teslîm eylediklerinde ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine [müte‘allika] âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i ma‘lûme-i mezkûrede benim kat‘a alâka ve medhalim kalmayup mesfûrûn Anaştaş ve Aci Yordan ve Yakut zimmîlerin seviyyen müşterâ emvâlleri ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 22 B sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Ahmed Efendi.