İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 268 Hüküm no: 244 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Tohari v. Gavrayil’in mâlik olduğu sandalcı destgâhını Ahmed b. Mehmed’e sattığı Sandalcı aded 1 Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Tohari v. Gavrayil nâm zimmî meclis-i şer‘-i hatîr-i lâzımü’t-tevkīrde esnâf-ı mezkûre mülâzım kalfalarından işbu bâ‘isü’l-kitâb Ahmed b. Mehmed nâm kimesne mahzarında ikrâr-ı tam ve takrîr-i kelâm edip bâlâda zikr ve beyân olunan destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa merkūm Ahmed’e bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ü teslîm ben dahi yedinden ahz ü kabz edip [56a] mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup merkūm Ahmed’in mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 24 B sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa, Molla Mahmud el-Muhzır.