İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 268 Hüküm no: 245 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Aleksi’nin bakkal dükkânını borcuna karşılık Aşçı Mehmed Ağa b. Ömer’e rehin bıraktığı 1.000 guruşa bakkāl idâne Mahmiye-i İstanbul’da kâin bakkāl esnâfından Vasil v. Aleksi nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Aşçı Mehmed Ağa b. Ömer nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Nûr-ı Osmânî Câmi‘-i şerîfi kurbünde vâki‘ Ahmed Çelebi dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi aharın mâlı olmağla mâ‘adâsı olup benim yedimde mâlım olan altmış sehm hisse-i şâyi‘amı mezbûr Aşçı Mehmed Ağa’ya şerîkim izniyle zikri âtî bana idâne edeceği meblağ mukābelesinde rehin vaz‘ ve vech-i lâyıkı üzere teslîm eylediğimde ol dahi irtihân ve kabz ve kabûl ve yine bana i‘âre ve teslîm ben dahi isti‘âre ve kabz eyledikden sonra merkūm Aşçı Mehmed Ağa mâlından bana bin guruş iktirâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semeni işbu târih-i kitâbdan altı ay tamamına değin müeccel ve mev‘ûd yine mezbûr Aşçı Mehmed Ağa’nın mâlından ve yedinden iştirâ ve kabz eylediğim bir yeşil çuka biniş semeninden dahi yetmiş beş guruş ki cem‘an bin yetmiş beş guruş zimmetimde mezbûr Aşçı Mehmed Ağa’ya edâsı vâcib deynim olup mukābelesinde rehin olan âlât-ı lâzıme-i ma‘lûme hissesi bâlâda tahrîr olunduğu üzere yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] 18 B sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi.