İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 269 Hüküm no: 246 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ahmed’in kadayıfçı dükkânı yarım hissesini Hasene Hatun bt. Mehmed’e sattığı Aksaray’da kadayıfçı gediği mübâya‘asıdır Mahmiye-i İstanbul’da Horhor kurbünde Baba Hasan Alemî mahallesinde sâkin iken bundan akdem vefât eden Kadayıfçı el-Hâc Ahmed b. Mehmed’in verâseti sulbî kebîr oğulları Kadayıfçı Mehmed Efendi ve Molla Hüseyin’e münhasıra ve tashîh-i meselesi iki sehmden olup sehmeyn-i merkūmeynin birer sehmi oğulları mezbûrândan her birine isâbeti tahakkukundan sonra mezbûr Molla Hüseyin meclis-i şer‘-i hatîr-i lâzımü’t-tevkīrde bâ‘isetü’l-kitâb Hasene Hatun bt. Mehmed’in zevci ve tarafından husûs-ı âti’l-beyânı tasdîka vekîl-i şer‘îsi merkūm Kadayıfçı Mehmed Efendi mahzarında bi’l-verâse ikrâr-ı tam ve takrîr-i kelâm edip mahmiye-i mezbûrede Aksaray kurbünde Murad Paşa Câmi‘-i şerîfi civârında Kocaşlar karşısında vâki‘ ma‘lûmü’l-hudûd bir bâb kadayıfçı dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme babam müteveffâ-yı mezbûr el-Hâc Ahmed’in ile’l-vefât yedinde mâlı ve mülkü ve ba‘de vefâtihi ber-tashîh-i merkūm karındaşım mezbûr ile bana mevrûs olmağın ben âlât-ı lâzıme-i mezkûreden ber-tashîh-i merkūm akd-i âti’z-zikrin sudûruna değin yedimde mâl-ı mevrûsum olan bir hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve karındaşım ve şerîkim vekîl-i mezbûrun izin ve icâzetiyle beş yüz guruşa karındaşım merkūmun zevcesi müvekkile-i mezbûre Hasene Hatun’a bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i mezkûrenin ber-tashîh-i merkūm bir sehminde benim kat‘a alâka ve medhalim kalmayup müvekkile-i mezbûre Hasene Hatun’un mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî gurre-i Ş sene 1238. Şühûdü’l-hâl: Çörekçiler Kethudâsı İbrahim Ağa b. Mustafa, Muhzır Molla Mahmud, Yiğitbaşı Mehmed Usta b. Osman, Yazıcı Ali Efendi b. Süleyman, Irgatpazarlı Kadayıfçı el-Hâc Yusuf, Koska’da Kadayıfçı el-Hâc Ahmed.