İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 277 Hüküm no: 256 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Mehmed’in kahve dükkânını Seyyid İsmail b. Seyyid Mehmed ve Seyyid Ali Beşe b. Mahmud’a sattığı 4.000 guruşa kahve gediği mübâya‘asıdır. Fi’l-asl vilâyet-i Anadolu’da Zile kazâsı ahâlisinden Sarı Odabaşı oğlu demekle ma‘rûf Mehmed Efendi b. Mehmed nâm kimesne meclis-i şer‘-i şerîf-i enverde bâ‘isü’l-kitâb kendi nefsinde asıl ve li-ebeveyn er karındaşı oğlu es-Seyyid İsmail b. es-Seyyid Mehmed tarafından husûs-ı âti’l-beyânı tasdîka vekîl-i şer‘îsi es-Seyyid Ali Beşe b. Mahmud nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan mahmiye-i İstanbul’da Bahçekapısı hâricinde İstanbul Ağası iskelesi nâm mahâlde vâki‘ ma‘lûmü’l-hudûd bir bâb kahve dükkânı derûnunda mevcûde beyne’l-esnâf gedik ta‘bîr olunur on tonbak zarf ve dokuz fincan ve iki ibrik ve beş çizme ve bir leğen ibrik ve bir maşa ve bir kürek ve bir mir’ât ve bir kandil ve üç nargile ve bir şerbet ibriği ve bir tas ve bir mangal ve bir şamdan ve on şilte ve yedi yastık ve sekiz duhan çubuğu ve bir peştahta ve bir küp ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile dört bin guruşa mezbûr es-Seyyid Ali Beşe ile müvekkil-i mezbûr karındaşı oğlu es-Seyyid İsmail’e nısfiyet üzere şerîken bey‘ ve temlik ve teslîm eylediğimde onlar dahi ber-vech-i muharrer iştirâken yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin guruşu bana def‘ ü teslîm eylediklerinde ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda [mevcûde] gedik ta‘bîr olunan âlât-ı lâzıme-i merkūmede benim kat‘a alâka ve medhalim kalmayup asıl-ı merkūm es-Seyyid Ali Beşe ile müvekkil-i mezbûr karındaşı oğlu es-Seyyid İsmail’in ber-vech-i muharrer nısfiyet üzere iştirâken mâl-ı müşterâları ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ş sene 1238. Şühûdü’l-hâl: Sultan odaları Hancısı Mehmed Ağa b. Halil, muhzırlar Kethudâsı Hafız İsmail Efendi b. Mustafa, Muhzır Molla Mahmud b. Mahmud.