İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 278 Hüküm no: 257 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rabia Hatun bt. Ahmed’in kurukahve dükkânını üvey babası Ahmed Ağa b. Abdullah’a sattığı Kurukahveci Asl-ı târih-i hüccet fî 17 Rebî‘ülevvel sene 1192. Mahmiye-i İstanbul’da Laleli kurbünde Kızıltaş Mahallesi sâkinelerinden olup zâtı ta‘rîf-i şer‘î ile mu‘arrefe olan Şerîfe Rabia Hatun bt. es-Seyyid el-Hâc Ahmed meclis-i şer‘-i hatîr-i lâzımü’t-tevkīrde kurukahveci esnâfından üvey babası işbu bâ‘isü’l-kitâb el-Hâc Ahmed Ağa b. Abdullah nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Rüstempaşa Câmi‘-i şerîfi kurbünde Na‘lburlar sûkunda vâki‘ bâ-fermân-ı âlî verilen kahve tevzî‘inde ma‘lûmü’l-hudûd bir bâb kurukahveci dükkânı derûnunda mevcûde beyne’l-esnâf gedik ta‘bîr olunur iki terâzî ma‘a derâhim ve bir kantar ve bir peşkun ve bir akçe tahtası ve bir seccâde ve sâir âlât-ı lâzıme-i ma‘lûmenin dört sehm i‘tibâriyle bir sehmi Abdullah nâm kimesnenin ve iki sehmi üvey babam mezbûr el-Hâc Ahmed Ağa’nın mâlları olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i mezbûrun izin ve icâzetiyle iki bin beş yüz guruşa mezbûr el-Hâc Ahmed Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i mezkûrede benim kat‘a alâka ve medhalim kalmayup i‘tibâr-ı merkūm üzere iki sehmi mukaddemâ ve bir sehmi hâlâ ber-minvâl-i muharrer şirâen ki cem‘an üç sehmi mezbûr el-Hâc Ahmed Ağa’nın mâlı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ş sene 1238. Şühûdü’l-hâl: Attârlar Kethudâsı es-Seyyid Mustafa, Kazakçı el-Hâc Hüseyin Ağa, Manav Hasan Ağa, Pirinçci Mehmed Nuri Ağa ve gayruhum.