İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 279 Hüküm no: 259 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Usta b. İshak’ın çörekçi ve simitçi dükkânı gediğini Hasan Usta b. Ali’ye sattığı Hocapaşa’da çörekçi ve simidci Mahmiye-i İstanbul’da kâin simidci ve çörekçi esnâfından İbrahim Usta b. İshak nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Hasan Usta b. Ali mahzarında ikrâr-ı tam ve takrîr-i kelâm edip mahmiye-i mezbûrede Hocapaşa Hamamı ittisâlinde vâki‘ ma‘lûmü’l-hudûd bir bâb çörekçi ve simidci dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle on beş sehmi karındaşım İslâm’ın ve kırk beş sehmi Molla Hasan’ın ve otuz sehmi sâbıkā ekmekçiler Kethudâsı es-Seyyid Mustafa Ağa’nın ve on beş sehmi müştereken Mehmed ve diğer Hasan nâm karındaşların mâlları ve mülkleri olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan on beş sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i mezbûrûnun izin ve icâzetleriyle bin otuz guruşa mezbûr Hasan Usta’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm bin yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i ma‘lûmede benim kat‘a alâka ve medhalim kalmayup ber-vech-i muharrer yüz yirmi sehm i‘tibâriyle on beş sehmi mezbûr Hasan Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 Ş sene 1238. Şühûdü’l-hâl: Kethudâ İbrahim b. Mustafa, Yiğitbaşı Mehmed Usta b. Süleyman, Yazıcı Ali Efendi, Ayasofyalı İslâm Usta b. Hasan, Veznecilerli İsmail Usta b. Süleyman.