İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 280 Hüküm no: 260 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed Ağa b. Süleyman’ın zahîreci dükkânını borcuna karşılık Bezzazistânî Halil Ağa b. Salih’e rehin bıraktığı Zahîre idânesi Mahmiye-i İstanbul’da kâin zahîreci esnâfından es-Seyyid Ahmed Ağa b. Süleyman nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Bezzâzistânî Halil Ağa b. Salih nâm kimesne mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Balık Pazarı Kapısı hâricinde gümrük-i kebîr karşısında kâin Bakkāl el-Hâc Sadık ve Zahîreci Aci Simyon zimmî dükkânları beynlerinde vâki‘ bir bâb zahîreci dükkânı derûnunda mevcûde gedik ta‘bîr olunur bâ-defter-i müfredât âlât-ı lâzıme-i ma‘lûmenin nısfı gāib ani’l-meclis Sava nâm zimmînin mâlı olmağla mâ‘adâsı olup bâ-hüccet-i şer‘iye yedimde mâlım ve mülküm olan nısf hisse-i şâyi‘amı mezbûr Halil Ağa’ya zikri âtî bana idâne edeceği meblağ mukābelesinde şerîkim mesfûrun izin ve icâzetleriyle rehin vaz‘ ve teslîm eylediğimde ol dahi yedimden irtihân ve kab ve kabûl ve yine bana i‘âre ve teslîm ben dahi yedinden isti‘âre ve kabz ettikden sonra mezbûr Halil Ağa mâlından bana üç bin guruş ikrâz ve teslîm ben dahi yedinden iktirâz ve kabz ve kendi umûruma sarfla istihlâk edip meblağ-ı merkūm ile semeni işbu târih-i kitâbdan bir sene tamamına değin müeccel ve mev‘ûd [58b] yine mezbûr Halil Ağa’nın mâlından ve yedinden iştirâ ve kabz eylediğim bir cild Fetâvâ-yı Bezzâziye semeninden dahi dört yüz elli guruş ki cem‘an üç bin dört yüz elli guruş zimmetimde mezbûr Halil Ağa’ya vâcibü’l-edâ deynim olup nısf âlât-ı lâzıme-i mezkûre yedimde âriyetdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 11 Ş sene 1238. Şühûdü’l-hâl: Başyemiş Pazarbaşısı es-Seyyid İbrahim Sârım Bey b. Ahmed Bey, Bölükbaşı Mehmed Said, Muhzır Molla Hüseyin.