İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 281 Hüküm no: 261 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Anaştaş ve ortağı Lefter v. Kiryako’nun mâlik oldukları bakkal ve mağazayı Mehmed Said Ağa b. Mehmed’e sattıkları Bakkāl derûnunda mağaza 17.000 guruşa Mahmiye-i İstanbul’da kâin bakkāl esnâfından Yuvan v. Anaştaş nâm zimmî zikri âtî gedik âlâtında şerîki Lefter v. Kiryako zimmî hâzır olduğu hâlde ipçi esnâfından işbu bâ‘isü’l-kitâb Mehmed Said Ağa b. Mehmed mahzarında ikrâr-ı tam ve takrîr-i kelâm edip mahmiye-i mezbûrede Zindân kapısı dâhilinde kâin Buğdaycı sokağında vâki‘ tabaka-i ulyâda bir bâb ve vustâda bir bâb odaları müştemil ma‘lûmü’l-hudûd bir bâb mağaza derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yüz sehmi benim ve yirmi sehmi şerîkim hâzır-ı mersûm Lefter zimmînin iştirâ ve şâyi‘an yedimizde mâlımız ve mülkümüz ve zikr olunan odaları müştemil mağaza bi’l-icâreteyn mezbûr Mehmed Said Ağa’nın hâlâ bâ-re’y-i mütevellî tasarrufunda olup sâlifü’z-zikr odaları hâvî mağaza derûnunda olan gedik âlâtı bakkāl esnâfının nizâmımızda Başmuhâsebe’de mukayyed gediklerimizden olmayıp ancak mahmiye-i mezbûrede Zindân kapısı hâricinde Çobançeşmesi ittisâlinde vâki‘ nevnî dükkânı ismine mukayyed olup nâm-ı diğer yeni dükkân demekle ma‘rûf bir bâb bakkāl dükkânı gediğine mukaddemâ mâlikler olan bakkāl ustaları zikr olunan mağaza ve odalar gediğini dahi ma‘an bey‘ ü şirâ ile mağaza-i mezkûre ve odalar gedikleri dükkân-ı merkūma merbût olmak zu‘muyla mübâya‘a hüccetleri tahrîr ettirerek dükkân-ı mezkûr gediği ile ma‘an sâlifü’z-zikr odaları müştemil mağaza gediğine akd-i âti’z-zikrin sudûruna değin i‘tibâr-ı merkūm üzere benimle hâzır-ı mesfûr mâlikler olmamızla ben ve hâzır-ı mersûmdan her birimiz zikr olunan odaları müştemil mağaza gediği olan âlât-ı lâzıme-i ma‘lûmeyi dükkân-ı mezkûr gediğine merbût ve mukayyed olmamağla bi’l-cümle esnâf ve tüccâr ma‘rifetleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müstakıllen yedi bin guruşa mezbûr İpçi Mehmed Said Ağa’ya bey‘ ve temlik ve teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semeni olan meblağ-ı merkūm yedi bin guruşu benimle hâzır-ı mesfûr Lefter zimmîye def‘ ü teslîm eylediğinde biz dahi yedinden tamamen ve kâmilen ahz ü kabz ve hisse-i merkūmelerimize göre beynimizde iktisâm edip mebî‘-i mezkûrun tağrîr ve gabnine ve dükkân-ı merkūma merbûtiyetine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d ancak zikr olunan odaları müştemil mağaza derûnunda mevcûde gedik ta‘bîr olunur âlât-ı lâzıme-i merkūmede benim ve hâzır-ı mesfûr Lefter zimmînin kat‘a alâka ve medhalimiz kalmayup mezbûr İpçi Mehmed Said Ağa’nın mâlı ve mülk-i müşterâsı olmuşdur dedikde hâzır-ı mersûm Lefter zimmî ile mezbûr Mehmed Said Ağa her biri tasdîk etmeğin mâ-vaka‘a bi’t-taleb ketb olundu. Fî 4 Ş sene [1]238. Şühûdü’l-hâl: Bal Kapanı Nâzırı Alemdar es-Seyyid el-Hâc Ahmed Ağa b. ( ), Kâtib Ahmed Efendi b. ( ), Galata Nâzırı Süleyman Ağa b. ( ), Bölükbaş Abdi b. ( ), tüccârdan kasab dâmâdı el-Hâc Mustafa Ağa b. ( ), bakkāllar Pazarbaşısı Süleyman Ağa b. ( ).