İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 282 Hüküm no: 262 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İncici Benyamin v. Sabatay’ın mâlik olduğu kuyumcu gediğini Çekiçoğlu Andon v. Serkiz’e sattığı Kuyumcu gedikli mübâya‘ası 2.500 guruş Havâss-ı Refî‘a kazâsına muzâfe kasaba-i Hasköy’de mütemekkin İncüci Benyamin v. Sabatay nâm Yahûdî meclis-i şer‘-i hatîr-i lâzımü’t-tevkīrde mahmiye-i İstanbul’da kâin kuyumcu esnâfından işbu hâmilü’r-rakīm Çekiçoğlu Andon v. Serkiz muvâcehesinde ikrâr-ı tam ve takrîr-i kelâm edip mahmiye-i mezbûrede kuyumcular sûkunda bezzâzistân-ı atik kuyumcular kapısı karşısında vâki‘ Ağa sokağının sağ tarafından addolundukda ikişer gedikli on iki dükkân tekmîlinde on üçüncü bir gedikli dükkâna muttasıl on dördüncü iki gedikli ve şehriye dört guruş kadîm kirâlı bir bâb kuyumcu dükkânı derûnunda beyne’l-esnâf iki gedik ta‘bîr olunur akd-i âti’z-zikrin sudûruna değin yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile [59a] her birini bin ikişer yüz ellişer guruşdan cem‘an iki bin beş yüz guruşa mesfûr Çekiçoğlu Andon zimmîye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semenleri olan meblağ-ı mecmû‘-ı mezkûr iki bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iki gedik ta‘bîr olunur kuyumcu âlât-ı lâzıme-i ma‘lûmelerinde benim kat‘a alâka ve medhalim kalmayup mersûm Çekiçoğlu Andon zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mu‘teber mâ-vaka‘a [bi’t-taleb ketb olundu.] Fî 12 Ş sene 1238. Şühûdü’l-hâl: Kuyumcular Kethudâsı Ali Ağa b. ( ), Muhzır Molla Mahmud b. ( ), Muhzır Molla Halil b. ( ), Mütevellî Takfor v. Moğıses, Yiğitbaşı Toros v. Kazer, Nâzır Aci Bedros v. ( ), Küpeci Avadik v. Nâzır, Serope v. ( ).