İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 283 Hüküm no: 263 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Avadik’in mâlik olduğu yarım hisse kolancı gediğini Karabet v. Simaven’e sattığı Nısf kolancı gediği mübâya‘ası Mahmiye-i İstanbul’da Saksılı Han’da mütemekkin sarrâf tâifesinden Karabet v. Avadik nâm zimmî meclis-i şer‘-i hatîr-i lâzımü’t-tevkīrde yine sarrâf tâifesinden işbu hâmilü’r-rakīm diğer Karabet v. Simaven nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede bezzâzistân-ı atik kurbünde Kolancılar sûkunda köşe başında vâki‘ ma‘lûmü’l-hudûd bir bâb kolancı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfını işbu hâzır bi’l-meclis Kîseci Mıgırdıç v. Serak nâm zimmînin mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i hâzır-ı mersûmun izin ve icâzetiyle iki bin guruşa mesfûr Sarrâf-ı diğer Karabet zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde ben dahi yedinden bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin nısf hisse-i şâyi‘asında benim kat‘a alâka ve medhalim kalmayup mesfûr Sarrâf-ı diğer Karabet zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 11 Ş sene 1238. Şühûdü’l-hâl: Muhzırlar Kethudâsı Hafız İsmail Ağa b. Mustafa, Muhzır Molla Hüseyin b. Yusuf, Muhzır Molla Mahmud b. Mahmud ve gayruhum.