İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 284 Hüküm no: 264 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Tahir Efendi b. İsmail’in çörekçi gediğini Yiğitbaşı Mehmed Usta b. Osman’a sattığı Karaköy’de Dörtyolağzı’nda çörekçi mübâya‘ası Mahmiye-i İstanbul’da kâin uncu esnâfından es-Seyyid Mehmed Tâhir Efendi b. İsmail tarafından husûs-ı âti’l-beyânı ikrâra vekîl olduğu sâbıkā ekmekçiler Kethudâsı es-Seyyid İsmail Ağa b. Osman ve hâlâ çörekçiler Kethudâsı İbrahim Ağa b. Mustafa nâm kimesneler şehâdetleriyle ber-nehc-i şer‘î sâbit olan Uncu Ohan v. Asador nâm zimmî meclis-i şer‘-i hatîr-i lâzımü’t-tevkīrde sâbıkā Etmekçiler Kethudâsı mezbûr es-Seyyid İsmail Ağa hâzır olduğu hâlde mahmiye-i mezbûrede vâki‘ çörekçi ve simidci esnâfının yiğitbaşıları işbu bâ‘isü’l-kitâb Mehmed Usta b. Osman mahzarında bi’l-vekâle ikrâr-ı tam ve takrîr-i kelâm edip müvekkilim mezbûr es-Seyyid Mehmed Tâhir Efendi mahmiye-i mezbûrede Karagümrük kurbünde Dörtyol ağzı nâm mahâlde kâin bir tarafdan turşucu dükkânı ve iki tarafdan menzil ve bir tarafdan tarîk-i âm ile mahdûd bir bâb çörekçi ve simidci dükkânı derûnunda mevcûde beyne’l-hıref gedik ta‘bîr olunur ber-mûceb-i defter-i müfredât çörekçi ve simidci âlât-ı lâzıme-i ma‘lûmesinin yüz yirmi sehm i‘tibâriyle altmış sehmi Çörekçi Hüseyin Usta’nın ve kırk sehmi benim ve yirmi sehmi hâzır-ı mezbûr es-Seyyid İsmail Ağa’nın yedlerimizde iştirâken mâlımız ve mülkümüz olmağın ben âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan kırk sehm hisse-i şâyi‘a-i mezkûremi sekiz yüz guruşa ve hâzır-ı mezbûr es-Seyyid İsmail Ağa bâ-hüccet-i şer‘iye yedinde mâlı olan yirmi sehm hisse-i şâyi‘a-i merkūmesini dört yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve mezbûr Hüseyin Usta’nın izin ve icâzetiyle mezbûr Yiğitbaşı Mehmed Usta’ya bey‘ ve temlik [59b] ve vech-i lâyıkı üzere teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semeni olan meblagayn-i merkūmeynden sekiz yüz guruşu bana << def‘ ve dört yüz >> ve dört yüz guruşu hâzır-ı mezbûr es-Seyyid İsmail Ağa’ya def‘ ü teslîm eylediğinde her birimiz dahi yedinden bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birlerimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim hâzır-ı mezbûr es-Seyyid İsmail Ağa’nın kat‘a alâka ve medhalimiz kalmayup i‘tibâr-ı merkūm üzere cem‘an altmış sehmi mezbûr Yiğitbaşı Mehmed Usta’nın ber-minvâl-i muharrer iştirâsı ve hakk-ı sırfı olmuşdur dedi dedikde hâzır-ı mezbûr es-Seyyid İsmail Ağa ile merkūm Yiğitbaşı Mehmed Usta’dan her biri tasdîk etmeğin mâ-vaka‘a [bi’t-taleb ketb olundu.] Fî 13 Ş sene 1238. Şühûdü’l-hâl: Çörekçiler Kethudâsı İbrahim Ağa b. Mustafa, Yazıcı Ali Efendi b. Süleyman, Çörekçi es-Seyyid el-Hâc Ahmed Usta b. es-Seyyid Osman, Çörekçi Süleyman Alemdar b. Mehmed, Fenerli Ali Usta b. Mehmed.