İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 285 Hüküm no: 265 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Seyyid Ademzade Hafız Mehmed Salih b. Mehmed Said Efendi’nin mâlik olduğu sandalcı destgâhını Halebli Hacı Mehmed b. Hacı İbrahim’e sattığı Sandalcı Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından es-Seyyid Âdemzâde es-Seyyid Hafız Mehmed Salih b. es-Seyyid el-Hâc Mehmed Said Efendi’nin li-ebeveyn karındaşı ve tarafından husûs-ı âti’l-beyânı ikrâr ve i‘tâ-i hüccete vekîl olduğu Yiğitbaşı Ebûbekir Ağa b. Ali ve es-Seyyid Ahmed Usta b. Abdullah nâm kimesneler şehâdetleriyle ber-nehc-i şer‘î sâbit olan es-Seyyid Hafız Mehmed Emin Efendi meclis-i şer‘-i şerîf-i enverde esnâf-ı merkūmeden es-Seyyid Âdemzâde çırağı işbu bâ‘isü’l-kitâb Halebli el-Hâc Mehmed b. el-Hâc İbrahim mahzarında bi’l-vekâle ikrâr-ı tam ve takrîr-i kelâm edip karındaşım müvekkil-i merkūm es-Seyyid Hafız Mehmed Salih bâlâda tafsîl ve beyân olunan destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım olan beş aded destgâhımın dört adedini yedinde ibkā mâ‘adâ bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Mehmed’e iki yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ve teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup merkūm el-Hâc Mehmed’in mâl-ı müşterâsı ve hakk-ı sırfı olmuşdur dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 min-Ş sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa, es-Seyyid Ahmed Usta.