İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 289 Hüküm no: 271 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Kasım b. Mustafa ve müteveffâ Abdi’nin evlatlarına mâlik oldukları habbaz fırını için hüccet verilmesi Habbâz Mahmiye-i İstanbul’da kâin habbâz esnâfından işbu bâ‘isü’l-kitâb Çarşambalı Molla Kasım b. Mustafa nâm kimesne kezâlik esnâf-ı merkūmdan olup kendi nefsinden asıl ve karındaşları Süleyman Beşe ve Penbe ve Zeyneb ve Âişe nâm hatunlar evlâd-ı el-müteveffâ Abdi taraflarından husûs-ı âti’l-beyânı tasdîka vekîl-i şer‘îleri Muhtâr Beşe b. el-mezbûr Abdi hâzır olduğu hâlde takrîr-i kelâm ve ta‘bîr ani’l-merâm edip mahmiye-i mezbûrede Çarşambapazarı nâm mahâlde vâki‘ ma‘lûmü’l-hudûd beş horoslu bir bâb habbâz değirmeni ve ona merbût bir bâb habbâz fırını derûnlarında mevcûde beyne’l-esnâf gedik ta‘bîr olunur yirmi re’s bârgir ve sâir âlât-ı lâzıme-i ma‘lûmeden on re’s bârgir ve onlara isâbet eden sâir âlât-ı lâzıme-i ma‘lûme benim ve sekiz re’s bârgir ve onlara isâbet eden sâir âlât-ı lâzıme-i ma‘lûme müştereken müteveffâ Abdi’nin evlâdı asıl-ı hâzır-ı mezbûr Muhtâr Beşe ile karındaşları müvekkilûn-ı mezbûrun Süleyman Beşe ve Penbe ve Zeyneb ve Âişe nâm hatunların ve iki re’s bârgir ve onlara isâbet eden sâir âlât-ı lâzıme-i ma‘lûme müştereken gāibân ani’l-meclis Veysel ve kız karındaşı Ümmügülsüm bt. İslâm’ın esnâf-ı merkūme defterinde mukayyed olduğu vechile iştirâken yedlerimizde mâlımız ve mülkümüz olup lâkin yedimizde sened olmamağla takrîrim tahrîr ve erbâb-ı vukūftan istihbâr olunup sened olmak üzere kıbel-i şer‘den yedimize bir kıt‘a hüccet i‘tâ olunmak matlûbumuzdur dedikde asıl ve vekîl-i hâzır-ı mezbûr Muhtâr Beşe dahi ba‘de’t-tasdîk merkūm Molla Kasım’ın bi’l-cümle takrîr-i meşrûhu vâkı‘a mutâbık ve âlât-ı lâzıme-i mezkûre ber-vech-i muharrer iştirâken mezbûrûnun yedlerinde mâlları olup esnâf-ı merkūme defterinde dahi mukayyed olduğunu zeyl-i kitâbda muharrerü’l-esâmî esnâf-ı merkūme kethudâsı ve nizâm ustaları alâ-tarîki’ş-şehâde haber vermeleri [ile] li-ecli’s-sened mâ-vaka‘a bi’t-taleb ketb olundu. Fî 22 min-Ş sene 1238. Şühûdü’l-hâl: Ekmekçiler [Yiğitbaşı] Ali b. ( ), [Ekmekçiler] Kethudâsı Mehmed Efendi b. ( ), Nazım Ağa b. Ali, Feyzullah Ağa b. Murad, Molla Hüseyin b. Nezir, Molla Ali b. Ömer.