İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 290 Hüküm no: 272 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Tanaş’ın aşçı ve hoşafçı dükkânını Dimo v. diğer Tanaş’a sattığı Aşçı ve hoşâbcı Mahmiye-i İstanbul’da kâin aşçı ve hoşâbçı ve çevrenci esnâfından Nikola v. Tanaş nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Dimo v. diğer Tanaş nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Tahtakale kurbünde kâin bozahâne ittisâlinde vâki‘ ma‘lûmü’l-hudûd bir bâb aşçı ve hoşâbçı dükkânı derûnunda mevcûde beyne’l-esnâf gedik ta‘bîr olunur yirmi şiş ve on hoşâb tası ve dört kazgan ve dört karavana ve iki batya ve sâir âlât-ı lâzıme-i ma‘lûmenin yüz yirmi sehm i‘tibâriyle yüz on iki sehm bir pul hisse-i şâyi‘ası âharların mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim yedimde mâlım ve mülküm olan yedi buçuk sehm bir pul hisse-i şâyi‘ası ile yine mahâll-i mezkûrda vâki‘ kezâlik ma‘lûmü’l-hudûd zikr olunan bir bâb bozahâne derûnunda mevcûde beyne’l-esnâf gedik ta‘bîr olunur bir kazgan ve dört fıçı ve bir çekmece ve sâir âlât-ı lâzıme-i ma‘lûmeden yüz yirmi sehm i‘tibâriyle yüz on altı buçuk sehmi âharların mâlı olmağla mâ‘adâsı olup kezâlik bâ-hüccet-i şer‘iye yedimde mâlım ve mülküm olan üç buçuk sehm hisse-i şâyi‘asını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâm izin ve icâzetleriyle iki bin guruşa mesfûr Dimo zimmîye bey‘ ve temlik ve her birimiz vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semenleri olan meblağ-ı merkūm iki [bin] guruşu bana def‘ ü teslîm eylediğinde ben dahi yedinden tamamen ve kâmilen ahz [61a] ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ-ba‘d zikr olunan aşçı ve hoşâbçı âlât-ı lâzımesinden i‘tibâr-ı mezkûr üzere yedi buçuk sehm bir pul hisse-i şâyi‘a ile sâlifü’l-beyân bozahâne âlât-ı lâzımesinden kezâlik i‘tibâr-ı merkūm üç buçuk sehm hisse-i şâyi‘ada benim kat‘a alâka ve medhalim kalmayup her biri mesfûr Dimo zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mu‘teber mâ-vaka‘a bi’t-taleb olundu. Fî 16 min-Ş sene 1238. Şühûdü’l-hâl: Yiğitbaşı Ali Ağa b. ( ), Yazıcı Mehmed Eşref Efendi b. ( ), Kebâbcılar Kethudâsı Hüseyin Ağa b. ( ), Mütevellî Mehmed Emin Ağa b. ( ), sâbık Kethudâ es-Seyyid el-Hâc Hasan Ağa b. ( ), Bahçekapılı el-Hâc Hüseyin Usta b. ( ), Usta Kosta zimmî v. ( ), Şişman Tarbin zimmî v. ( ), Panco zimmî v. ( ), diğer Tarbin zimmî v. ( ), Yani zimmî v. ( ).