İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 291 Hüküm no: 273 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. İbrahim’in arpacı esnafı kethudalığına tayini Arpacı kethudâ nasbı Mahmiye-i İstanbul’da Kapan-ı dakīk ve mahâll-i sâirede ve bilâd-ı selâse ve tevâbi‘lerinde kâin bi’l-cümle arpacı esnâfının bir müddetden beri kethudâları olan Küçük Musa nâm kimesne umûr-ı esnâfı edâya rü’yetden izhâr-ı acz ve keff-i yed edip azlolunmağla yerine esnâf-ı merkūme üzerlerine kethudâ nasbı lâzım ve mühim olmağın esnâf-ı merkūmenin örf ve âdetlerine vâkıf ve şurût-ı nizâmlarını arîf ve bi’l-cümle tüccâr ve esnâfın mu‘temed ve muhtârları ve her vechile kethudâlık umûrunu rü’yete kādir idüğü zeyl-i kitâbda muharrerü’l-esâmî Kapan-ı dakīk tüccârı ve esnâfı olan mevsûku’l-kelim Müslimîn haberleriyle lede’ş-şer‘i’l-enver zâhir ve mukır olan esnâf-ı merkūmeden işbu bâ‘isü’l-kitâb Hasan Ağa b. İbrahim nâm kimesneyi hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri kethudâ-yı sâbık-ı mezbûrun yerine esnâf-ı merkūme üzerlerine kethudâ nasb ü ta‘yîn ve esnâfından kimesneyi hilâf-ı şer‘-i şerîf ve mugāyir-i rızâ te‘addî ve rencîde etmemek üzere tenbîh buyurduklarında ol dahi kabûl ve ber-mûceb-i emir ve tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 23 Ş sene [12]38. Şühûdü’l-hâl: Kapan-ı dakīk tüccârından Gökçezâde es-Seyyid el-Hâc Osman Ağa b. ( ), tüccârdan Penbecik? Mehmed Ağa b. ( ), tüccârdan es-Seyyid el-Hâc Ömer Ağa b. ( ), tüccârdan es-Seyyid el-Hâc Mehmed Said Efendi b. ( ), Arpacı Beyzâde Mehmed Ağa b. ( ), Arpacı Perdahçı oğlu İbrahim Ağa b. ( ), Arpacı Bağdâdlı Mehmed Ağa b. ( ), Arpacı es-Seyyid el-Hâc İsmail Ağa b. ( ), Arpacı Balıoğlu Ahmed Ağa b. ( ) Arpacı Süleyman Ağa b. ( ).