İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 292 Hüküm no: 274 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Sideri’nin vakıf fırancalacı fırınını Kethuda Mehmed Efendi b. Ali ile Ohannes v. Tomas’a kiraladığı Fırancalacı fırını ba‘de’l-mühâyâ peştemâllik ile îcâr Mahmiye-i İstanbul’da Eğrikapı dâhilinde Tekfursarayı nâm mahâlde kâin ma‘lûmü’l-hudûd bir bâb vakıf fırancalacı fırını derûnunda mevcûde beyne’l-esnâf gedik ta‘bîr olunur kezâlik vakıf fırancalacı âlât-ı lâzıme-i ma‘lûmesinden yüz yirmi sehm i‘tibâriyle on beş sehm hisse-i şâyi‘asına bâ-temessük-i mütevellî mutasarrıf olan fırancalacı Kostandi v. Sideri nâm zimmî meclis-i şer‘-i hatîr-i lâzımü’t-tevkīrde bâ‘iseyü’l-vesîka hâlâ ekmekçiler Kethudâsı Mehmed Efendi b. Ali tarafından husûs-ı âti’l-beyânda vekîl-i şer‘îsi Uncu Osman Ağa b. Ali ile esnâf-ı merkūmeden Ohannes v. Tomas nâm zimmî muvâcehelerinde ikrâr-ı tam ve takrîr-i kelâm edip zikr olunan fırancalacı fırını gediği olan [âlât-ı] lâzıme-i ma‘lûmeden ber-i‘tibâr-ı merkūm bâ-temessük-i mütevellî tasarrufumda olan on beş sehm hisse-i şâyi‘am ancak fırın-ı mezkûru sâir şerîkleri olan hissedârları ile beynimizde mühâye’eten tasarruf ve zabt etmemizle her dört senede altı ay müstakıllen ben zabt ü tasarruf ve i‘mâl etmek üzere mühâye’eten etmiş olduğuma binâen işbu gelecek bin iki yüz otuz dokuz senesi Muharremi’l-harâmı gurresinden zaman-ı zabtım olan altı ay müddet ki cem‘an ol-vechile bir sene müstakıllen mühâye’eten zabt ü tasarruf edeceğim müddetde âlât-ı lâzıme-i mezkûreyi beyne’l-esnâf peştemâllik ta‘bîr olunur yedi bin guruş ücret kavliyle müvekkil-i mezbûr Mehmed Efendi ile mesfûr Ohannes zimmîye sûret-i îcârda kāide-i esnâf üzere vermemle onlar dahi kabûl ve zikr olunan peştemâllik ta‘bîr olunur yedi bin guruşu üzerlerine havâle eylediğim ma‘lûmü’l-esâmî ashâb-ı düyûnuma edâya ta‘ahhüd etmeleriyle ben dahi fîmâ-ba‘d merkūmânın ber-vech-i muharrer müddet-i mezkûre hulûlünde âlât-ı mezkûreyi zabt ve tasarruf ve fırın-ı mezkûru i‘mâllerine kat‘a ta‘arruz etmemek üzere ta‘ahhüd eyledim dedikde hıfzen li’l-makāl mâ-vaka‘a [bi’t-taleb ketb olundu.] Fî 20 Ş sene 1238. Şühûdü’l-hâl: Muhzır Molla Hüseyin b. Yusuf, Muhzır Molla Mahmud b. Mahmud, Muhzır Molla Halil b. ( ), Fırancalacı Hasköylü Aci Yorgi v. Manol, Pandeli oğlu Todori v. ( ), Aci Yani v. Mihal, Çavuş İstemat v. Yorgi.