İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 293 Hüküm no: 275 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Hasan oğlu Seyyid Hasan Yazıcı b. Halil’in kuruyemişci dükkânını Ali Yazıcı b. Seyyid Musa’ya sattığı Kuruyemişci mübâya‘ası 3.000 guruş Mahmiye-i İstanbul’da Zeyrek kurbünde Hızır Bey mahallesinde sâkin kuruyemişci esnâfından Kara Hasan oğlu es-Seyyid Hasan Yazıcı b. Halil nâm kimesne meclis-i şer‘-i hatîr-i lâzımü’t-tevkīrde esnâf-ı merkūmeden işbu bâ‘isü’l-kitâb es-Seyyid Ali Yazıcı b. es-Seyyid Musa mahzarında ikrâr-ı tam ve takrîr-i kelâm edip mahmiye-i mezbûrede Zindân kapısı hâricinde Kuruyemişciler sûkunda kâin bir tarafdan Hacı Rıdvan dükkânı ve bir tarafdan Türbeli dükkân ve bir tarafdan Merdivânî Mehmed Efendi Türbesi ve bir tarafdan tarîk-i âm ile mahdûd Emir Mustafa dükkânı demekle ma‘rûf bir bâb kuruyemişci dükkânı derûnunda mevcûde beyne’l-esnâf gedik ta‘bîr olunur iki destgâh ve iki terâzî ma‘a derâhim ve bir kantar ve iki garbul [galbur] ve bir peştahta ve bir akçe tahtası ve sâir âlât-ı lâzıme-i ma‘lûmeden akd-i âti’z-zikrin sudûruna değin bâ-hüccet-i şer‘iye nısf-ı şâyi‘leri işbu hâzır bi’l-meclis Yârenlioğlu Mustafa Ağa b. Mehmed’in mâlı ve mülkü olmağın mâ‘adâsı olup benim yedimde mâlım ve mülküm olan nısf-ı şâyi‘lerini ben tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim hâzır-ı mezbûrun izin ve icâzetiyle üç bin beş yüz guruşa mezbûr es-Seyyid Ali Yazıcı’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine [müte‘allika] âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i ma‘lûmenin nısf-ı şâyi‘lerinde benim kat‘a alâka ve medhalim kalmayup mezbûr es-Seyyid Ali Yazıcı’nın mâl-ı müşterâtı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb olundu.] Fî 27 Ş sene [12]38. Şühûdü’l-hâl: Kethudâ Mustafa b. Halil, es-Seyyid el-Hâc Ahmed Ağa b. Ali, Uzun Mehmed Ağa b. Hasan, el-Hâc Veliyüddin Ağa b. Mehmed, Mustafa Ağa b. İbrahim Ağa, Osman Ağa b. Mehmed, es-Seyyid Ahmed Ağa b. Mehmed, Yiğitbaşı Mustafa b. Hasan.