İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 294 Hüküm no: 276 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Ağa b. Mehmed Said’in vefatıyla yerine Hacı Salih b. Yunus b. Hamûda’nın fesçi esnafı kethudalığına tayini Fesçi kethudâsı nasbı Âsitâne-i aliyye -sânahallâhu te‘âlâ ani’l-âfât ve’l-beliyye-de ve mahrûse-i Galata’da kâin fesçi esnâfının başka başka kethudâları olmağla bir müddetden beri İstanbul’da fesçiler kethudâsı olan Kasım Ağa b. el-Hâc Mehmed Said vefât edip yeri hâlî kalmağla yerine esnâf-ı mezkûre üzerlerine bir kethudâ nasbı lâzım ve mühim olmağın esnâf-ı mezkûrenin nizâm-ı kadîmleri[ni] arîf ve örf ü âdetlerine vâkıf ve her vechile kethudâlık umûrunu idâre ve rü’yete kādir ve cümlesinin mu‘temed ve muhtârları idüğü zeyl-i sahîfede mektûbü’l-esâmî Müslimîn haberleriyle lede’ş-şer‘i’l-enver zâhir ve mukır olan esnâf-ı merkūmeden işbu bâ‘isü’l-kitâb el-Hâc Salih b. Yunus b. Hamuda nâm kimesneyi hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -rafe‘a kadrahû mevlâhu’l-Vehhâb- efendi hazretleri kethudâ ve müteveffâ-yı mezbûrun yerine İstanbul fesçi esnâfı üzerlerine kethudâ nasb ü ta‘yîn ve esnâfdan kimesneye hilâf-ı şer‘-i şerîf ve mugāyir-i rızâ te‘addî ve rencîde etmemek üzere emr ü tenbîh buyurduklarında ol dahi kethudâlık-ı merkūmu kabûl ve ber-mûceb-i emr ü tenbîh harekete ta‘ahhüd etmeğin mâ-vaka‘a [bi’t-taleb ketb olundu.] Fî 2 N sene [1]238. Şühûdü’l-hâl: Galata Fesçiler Kethudâsı Said Ağa b. ( ), İstanbul Başihtiyârı Süleyman Ağa b. ( ), Galata Başihtiyârı el-Hâc İsmail Ağa b. ( ), Ebû Zekeriya Şa‘bân Ağa b. ( ), el-Hâc Yahya b. Abdurrahman, el-Hâc Ahmed Ağa [b.] el-Hâc Lahyadini?, Salih Arvay b. ( ), Osman Ağa b. ( ), Ramazan b. Said, el-Hâc Yahya Ahmed Gırbâl , Ömer Ağa b. Ali Bırık?, el-Hâc Mehmed b. İbrahim, Süleyman b. Yahya diğer, el-Hâc Yahya b. Cuma, İstanbul Yiğitbaşısı es-Seyyid Hasan b. Ali, Galata Yiğitbaşısı es-Seyyid Mustafa Ağa b. es-Seyyid Hasan, Çavuş Mehmed b. Mehmed Hızır ve gayruhum. [Beyaz]