İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 297 Hüküm no: 278 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail v. Ohannes’in vârislerinin altı adet değirmen hissesinde birbirlerinin zimmetlerini ibra ettikleri 6 mıh değirmen âlât hissesi mübâya‘ası Mukābele şüd Habbâz tâifesinden olup bundan akdem sıla-i rahîm içün Âsitâne-i aliyyeden vatan-ı aslîsi olan Eğin kazâsı kurâlarından Apçağa karyesine azîmet eder iken esnâ-i râhda Kartal kasabasında hâlik olan Kolikoğlu Mikâil v. Ohannes zimmînin verâseti zikr olunan Apçağa karyesinde mütemekkinler zevce-i metrûkesi Harospima bt. Nikagos v. Atam Nasrâniye ile sulbiye kebîre kızı Ana Nasrâniyeye ve kendiden mukaddem hâlik olan sulbî oğlu Mıgırdıç zimmînin sulbî sagīr oğulları Nikagos ve Tatos ve Minas ve sulbiye sagīre kızları Penbe ve diğer Harospima’ya münhasıra ve tashîh-i mesele-i mîrâsları altmış dört sehmden olup sihâm-ı mezbûreden sekiz sehmi zevcesi mersûme Harospima Nasrâniyeye ve otuz iki sehmi kızı mesfûre Ana Nasrâniyeye ve altışar sehmi oğlunun oğulları sıgār-ı mersûmun Nikagos ve Tatos ve Minas’dan her birine ve üçer sehmi oğlunun kızları sagīretan-ı mersûmetân Penbe ve diğer Harospima’dan her birine isâbeti tahakkukundan sonra verese-i mersûmûndan zevce-i mersûme Harospima Nasrâniye tarafından bey‘-i âti’z-zikri ikrâr ve i‘tâ-i hüccete << vekîl olduğu >> kabûlüne mevkūfe vekîli olduğu şahsını ârifân karye-i mezbûre ahâlisinden bu esnâda Âsitâne-i aliyye’ye gelen Filibus v. Nikagos ve Dikriyos v. Kirkor zimmîler şehâdetleriyle ber-nehc-i şer‘î sâbit olan Kara Mağdis oğlu Sahak v. Abraham nâm zimmî meclis-i şer‘-i hatîr-i lâzımü’t-tevkīrde hâmilü’r-rakīm sıgār-ı mersûmûn Nikagos ve Tatos ve Manas ve Penbe ve diğer Harospima’nın anaları ve min-kıbeli’ş-şer‘ vasî-i mansûbeleri Margarita bt. İpyar v. Filibus Nasrâniye tarafından husûs-ı âti’l-beyânı tasdîka vekîl olduğu şahsını bilir şâhidân-ı mersûmân şehâdetleriyle sâbit olan Arakil v. Parnik nâm zimmî muvâcehesinde habbâzân kethudâsı ve bi’l-cümle nizâm ustaları hâzır oldukları hâlde bi’l-vekâle ikrâr-ı tam ve takrîr-i kelâm edip müvekkilem mersûme Harospima Nasrâniye medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût medîne-i merkūmede kâin biri uncu ve beşi ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesi vekîlim mersûm Kara Mağdis oğlu Sahak zimmînin ve dört re’s bârgir hissesi gāibân ani’l-meclis Harmanoğlu Agop v. Filibus zimmînin ve ikişer re’s bârgir hisseleri gāibân ani’l-meclis Kara Mağdis oğlu Mardıros v. İstefan zimmî ile Mağdis Anaya zimmî zevcesi Karyana bt. Vartos Nasrâniyenin ve mâ‘adâ on re’s bârgir hissesi zevcem mûrisimiz hâlik-i mersûmun sağlığında ile’l-helâk iştirâken ve şâyi‘an yedlerinde emvâlleri olup ba‘de helâkihî ber-mûceb-i tashîh-i mezkûr bir re’s ve altı mıh bârgir hissesi bana ve beş re’s bârgir hissesi kızı mesfûre Ana Nasrâniyeye ve mâ‘adâ üç re’s on sekiz mıh bârgir hissesi sıgār-ı mesfûrun li’z-zekeri mislü hazzi’l-ünseyeyn mevrûs olmağla hâlâ ben ber-vech-i muharrer irsen mâlike olduğum bir re’s altı mıh bârgir hisse-i şâyi‘amın bir re’s bârgir hissesini yedimde ibkā ve mâ‘adâ altı mıh bârgir hisse-i şâyi‘asını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile li’z-zekeri mislü hazzi’l-ünseyeyn olarak iki yüz guruşa sıgār-ı mersûmun içün kıbel-i şer‘den şirâya me’zûne olan anaları vasî-i müvekkile-i mersûme Margarita Nasrâniyeye bey‘ ve temlik ve vech-i lâyıkı üzere vekîli mersûm Arakil zimmîye teslîm eylediğimde ol dahi ber-vech-i muharrer sıgār-ı mersûmun içün bi’l-vesâye iştirâ ve temellük ve tesellüm ve kabz ü kabûl eyledikden sonra semeni olan meblağ-ı merkūm iki yüz guruş mutâlebesine müte‘allika da‘vâdan sıgār-ı mersûmunun zimmetlerini ibrâ-i âm ile ibrâ ve iskāt eylediğimde vasî-i müvekkile-i mersûme dahi bi’l-vesâye ibrâ-i mezkûrumu kabûl edip ba‘de’l-yevm gedik ta‘bîr olunan âlât-ı lâzıme-i ma‘lûme-i mezkûrenin ber-i‘tibâr-ı merkūm cem‘an dört re’s bârgir hissesi sıgār-ı mersûmûnun irsen ve şirâen li’z-zekeri mislü hazzi’l-ünseyeyn emvâl-i mahzları ve hakk-ı sırfları olup benim altı mıh bârgir hisse-i şâyi‘a-i mezkûrede kat‘a alâka ve medhalim kalmamışdır dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 21 C sene 1238. Şühûdü’l-hâl: Kethudâ-yı muhzırân İsmail Ağa, Molla Halil el-Muhzır ve gayruhum. [Beyaz]