İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 298 Hüküm no: 279 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail v. Ohannes’in vârislerinin birer re’s bargir hissesinde birbirlerinin zimmetlerini ibra ettikleri Birer re’s bârgir hisse mübâya‘ası Mukābele şüd Habbâz tâifesinden olup bundan akdem sıla-i rahîm içün Âsitâne-i aliyyeden vatan-ı aslî olan Eğin kazâsı kurâlarından Apçağa karyesine azimet eder iken esnâ-i râhda Kartal kasabasında hâlik olan Kolikoğlu Mikâil v. Ohannes zimmînin verâseti zikr olunan Apçağa karyesinde mütemekkinler zevce-i metrûkesi Harospima bt. Nikagos v. Atam Nasrâniye ile sulbiye kebîre kızı Ana Nasrâniyeye ve kendiden mukaddem hâlik olan sulbî oğlu Mıgırdıç zimmînin sulbî sagīr oğulları Nikagos ve Tatos ve Manas ve sulbiye sagīre kızları Penbe ve diğer Harospima’ya münhasıra ve tashîh-i mesele-i mîrâsları altmış dört sehmden olup sihâm-ı mezbûreden sekiz sehmi zevcesi mersûme Harospima Nasrâniyeye ve otuz iki sehmi kızı mesfûre Ana Nasrâniyeye ve altışar sehmi oğlunun oğulları sıgār-ı mersûmûn Nikagos ve Tatos ve Manas’dan her birine ve üçer sehmi oğlunun kızları sagīretân-ı mersûmetân Penbe ve diğer Harospima’dan her birine isâbeti tahakkukundan sonra verese-i mersûmûndan kızı mesfûre Ana Nasrâniyenin kaynı ve tarafından bey‘-i âti’z-zikri ikrâr ve i‘tâ-i hüccete kabûlüne mevkūfe vekîli olduğu şahsını ârifân karye-i mezbûre ahâlisinden bu esnâda Âsitâne-i aliyye’ye gelen Filibus v. Nikagos ve Dekiryos v. Kirkor zimmîler şehâdetleriyle ber-nehc-i şer‘î sâbit olan sarrâf tâifesinden Sakaoğlu dâmâdı Mardıros v. Mağdisar nâm zimmî meclis-i şer‘-i hatîr-i lâzımü’t-tevkīrde hâmilü’r-rakīm sıgār-ı mersûmûn Nikagos ve Tatos ve Manas ve Penbe ve diğer Harospima’nın anaları ve min-kıbeli’ş-şer‘ vasî-i mansûbeleri Margarita bt. İpyar v. Filibus Nasrâniye tarafından husûs-ı âti’l-beyânı tasdîka vekîl olduğu şahsını bilir şâhidân-ı mersûmân şehâdetleriyle sâbit olan Arakil v. Parnik nâm zimmî muvâcehesinde habbâzân kethudâsı ve bi’l-cümle nizâm ustaları hâzır oldukları hâlde bi’l-vekâle ikrâr-ı tam ve takrîr-i kelâm edip müvekkilem mersûme Ana Nasrâniye medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i merkūmede kâin biri uncu ve beşi ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesi işbu hâzır bi’l-meclis Kara Mağdis oğlu Sahak zimmînin ve dört re’s bârgir hissesi gāib ani’l-meclis Harman oğlu Agop v. Filibus zimmînin ve ikişer re’s bârgir hisseleri gāibân ani’l-meclis Kara Mağdis oğlu Mardıros v. İstefan zimmî ile Mağdis Ananya zimmî zevcesi Karyana bt. Vartos Nasrâniyenin ve mâ‘adâ on re’s bârgir hissesi babam mûrisimiz hâlik-i mersûmun sağlığında ile’l-helâk iştirâken ve şâyi‘an yedlerinde emvâlleri olup ba‘de helâkihî ber-mûceb-i tashîh-i mezkûr beş re’s bârgir hissesi bana ve bir re’s altı mıh bârgir hissesi anam mesfûre Harospima Nasrâniyeye ve mâ‘adâ üç re’s on sekiz mıh bârgir hissesi sıgār-ı mersûmûna li’z-zekeri mislü hazzi’l-ünseyeyn mevrûs oldukdan sonra anam mersûme Harospima Nasrâniye ber-mûceb-i tashîh-i mezkûr irsen mâlike olduğu bir re’s altı mıh bârgir hisse-i şâyi‘asının bir re’s bârgir hissesini yedimde ibkā ve mâ‘adâ altı mıh bârgir hissesini sıgār-ı mersûmûna bâ-hüccet-i şer‘iye li’z-zekeri mislü hazzi’l-ünseyeyn bey‘ ve temlik ve teslîm edip ol-vechile âlât-ı lâzıme-i ma‘lûme-i mezkûrede sıgār-ı mersûmûnun cem‘an dört re’s bârgir hisseleri olmağla ben dahi âlât-ı lâzıme-i mezkûrede ber-mûceb-i tashîh-i mezkûr irsen mâlike olduğum beş re’s bârgir hisse-i şâyi‘amın dört re’s bârgir hissesini yedimde ibkā ve mâ‘adâ bir re’s bârgir hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bât-ı sahîh-i şer‘î ve safka-i vâhide ile kezâlik li’z-zekeri mislü hazzi’l-ünseyeyn olarak sekiz yüz guruşa sıgār-ı mersûmûn içün kıbel-i şer‘den şirâya me’zûne olan anaları vasî-i müvekkile-i mersûme Margarita Nasrâniyeye bey‘ ve temlik ve vech-i lâyıkı üzere vekîli mersûm Arakil zimmîye teslîm eylediğimde ol dahi ber-vech-i muharrer sıgār-ı mersûmûn içün bi’l-vesâye iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm sekiz yüz guruş mutâlebesine müte‘allika da‘vâdan sıgār-ı mersûmûnun zimmetlerini ibrâ-i âm ile ibrâ ve iskāt eylediğimde vasî-i müvekkile-i mersûme dahi bi’l-vesâye ibrâ-i mezkûrumu kabûl edip ba‘de’l-yevm gedik ta‘bîr olunan âlât-ı lâzıme-i ma‘lûme-i mezkûrenin ber-i‘tibâr-ı merkūm cem‘an beş re’s bârgir hissesi sıgār-ı mersûmûnun irsen ve şirâen li’z-zekeri mislü hazzi’l-ünseyeyn emvâl-i mahzları ve hakk-ı sırfları olup benim bir re’s bârgir hisse-i şâyi‘a-i mezkûrede kat‘a alâka ve medhalim kalmamışdır dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 C sene 1238. Şühûdü’l-hâl: Eş-şâhidûne’s-sâbıkūn.