İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 300 Hüküm no: 280 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail v. Ohannes’in vârislerinin beş re’s bargir hissesinde birbirlerinin zimmetlerini ibra ettikleri Değirmen âlâtından beş re’s bârgir hisse mübâya‘ası Mukābele şüd Habbâz tâifesinden olup bundan akdem sıla-i rahîm içün Âsitâne-i aliyyeden vatan-ı aslî olan Eğin kazâsı kurâlarından Apçağa karyesine azîmet eder iken esnâ-i râhda Kartal kasabasında hâlik olan Kolikoğlu Mikâil v. Ohannes zimmînin kendiden mukaddem hâlik olan sulbî oğlu Mıgırdıç zimmînin sulbî sagīr oğulları Nikagos ve Tatos ve Manas ve sulbiye sagīre kızları Penbe ve Harospima’nın analarıdan min-kıbeli’ş-şer‘ vasî-i mansûbeleri Margarita bt. İpyar v. Filibus Nasrâniye tarafından bey‘-i âti’z-zikri ikrâr ve i‘tâ-i hüccete kabûlüne mevkūfe vekîl olduğu şahsını ârifân karye-i mezbûre ahâlisinden bu esnâda Âsitâne-i aliyye’ye gelen Filibus v. Nikagos ve Dekiryos v. Kirkor zimmîler şehâdetleriyle ber-nehc-i şer‘î sâbit olan Arakil v. Parnik nâm zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Markar oğlu Kirkor v. Mardıros nâm zimmî muvâcehesinde habbâzân kethudâsı ve bi’l-cümle nizâm ustaları hâzır oldukları hâlde bi’l-vekâle ikrâr-ı tam ve takrîr-i kelâm edip müvekkilem vasî-i mersûme Margarita Nasrâniye medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i merkūmede kâin biri uncu ve beş ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesi işbu hâzır bi’l-meclis Kara Mağdis oğlu Sahak zimmînin dört re’s bârgir hissesi gāib ani’l-meclis Harmanoğlu Agop v. Filibus zimmînin ve ikişer re’s bârgir hisseleri gāibân ani’l-meclis Kara Mağdis oğlu Mardıros v. İstefan zimmî ile Mağdis Anaya zimmî zevcesi Karyana bt. Vartos Nasrâniyenin ve yedi re’s altı mıh bârgir hissesi irsen kayın anam diğer Harospima bt. Nikagos Nasrâniyenin ve beş re’s bârgir hissesi kezâlik irsen kızı Ana Nasrâniyenin ve mâ‘adâ üç re’s on sekiz mıh bârgir hissesi li’z-zekeri mislü hazzi’l-ünseyeyn kezâlik irsen vasîleri olduğum evlâdım sıgār-ı mersûmûnun yedlerinden iştirâken ve şâyi‘an emvâlleri iken kayın anam mersûme diğer Harospima Nasrâniye ancak altı mıh bârgir hissesini ve kızı mesfûre Ana Nasrâniye dahi ancak bir re’s bârgir hissesini bundan akdemce birer kıt‘a hüccet-i şer‘iye ile evlâdım sıgār-ı mersûmûna kezâlik li’z-zekeri mislü hazzi’l-ünseyeyn bey‘ ve temlik ve teslîm edip ol-vechile âlât-ı lâzıme-i muharrere-i mezkûrenin cem‘an beş re’s bârgir hisse-i şâyi‘ası evlâdım sıgār-ı mersûmûnun li’z-zekeri mislü hazzi’l-ünseyeyn yedlerinde emvâlleri olmağla hâlâ ben evlâdım sıgār-ı mersûmûnun ber-vech-i muharrer irsen ve şirâen mâlikleri olduğu marü’z-zikr beş re’s bârgir hisse-i şâyi‘alarını bey‘a kıbel-i şer‘den me’zûne olmamla tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile el-yevm semen-i misli idüğü bi’l-ihbâr mütehakkık olan dört bin guruşa mersûm Kirkor zimmîye bi’l-vesâye bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezkûr dört bin guruşu müşterî-i mersûm Kirkor zimmî bana def‘ ü teslîm ben dahi yedinden tamamen ve kâmilen ahz ü kabz ve hâlik-i mersûmun defter-i kassâmı zeyline idhâl etmemle ba‘de’l-yevm âlât-ı lâzıme-i muharrere-i mezkûrenin beş re’s bârgir hisse-i şâyi‘ası mersûm Kirkor zimmînin emvâl-i müşterâtı ve hakk-ı sırfı olup evlâdım sıgār-ı mersûmûnun kat‘a alâka ve medhalleri kalmamışdır dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 Receb sene 1238. Şühûdü’l-hâl: Eş-şâhidûne’s-sâbıkūn.