İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 301 Hüküm no: 281 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz esnafından Kolikoğlu Mikail v. Ohannes’in kassam defteri zeyli Habbâz Kolikoğlu Mikâil nâm hâliğin zeyl-i defter-i kassâmı Mukābele şüd Ba‘de’d-defter zevce-i mersûme Harospima Nasrâniye takdîm olunan on re’s bârgir hisse-i şâyi‘asından sümün hissesine isâbet eden bir re’s altı mıh hissesinin bir re’s bârgir hissesini yedinde ibkā ve mâ‘adâ altı mıh hisse-i şâyi‘asını ve bint-i mesfûre Ana Nasrâniye dahi nısf hissesine isâbet eden beş re’s bârgir hissesinin dört re’s bârgir hissesini kezâlik yedinde ibkā ve mâ‘adâ bir re’s bârgir hisse-i şâyi‘asını birer kıt‘a hüccet-i şer‘iye ile li’z-zekeri mislü hazzi’l-ünseyeyn olarak sıgār-ı mersûmûn içün vasîleri anaları mesfûre Margarita Nasrâniyeye bey‘ ve teslîm etmeleriyle vasî-i mesfûre Margarita Nasrâniye tarafından vekîl-i sâbitü’l-vekâlesi olan mersûm Arakil zimmî dahi bu defa sıgār-ı mersûmunun âlât-ı mezkûrede irsen mâlikler oldukları üç re’s on sekiz mıh ve şirâen mâlikler oldukları bir re’s altı mıh cem‘an beş re’s bârgir hisselerini bâ-hüccet-i şer‘iye bi’l-vekâle âhara bey‘ etmekle semeni olup vekîl-i mersûmun kabz eylediği Guruş 4.000 Resm-i âdî 100 [Kalan] 3.900 [64a] Hissetü’l-ibni’l-ibni’l-mersûm Guruş 975 Hissetü’l-ibni’l-ibni’l-mersûm Guruş 975 Hissetü’l-ibni’l-ibni’l-mersûm Guruş 975 Hissetü’l-binti’l-ibni’l-mersûme Guruş 487,5 Hissetü’l-binti’l-ibni’l-mersûme Guruş 487,5 Bâlâ-yı defter ve zeyl-i defterde mastûr sıgār-ı mersûmûnun cem‘an hisse-i irsiyeleri olan sekiz bin yüz yetmiş sekiz guruş otuz parayı vasî-i müvekkile-i mesfûre Margarita Nasrâniye bi’l-vesâye kabz ve bilâ-zarûre kendi umûruna sarfla istihlâk edip zimmetinde sıgār-ı mersûmûna deyni olduğunu vekîli mesfûr Arakil zimmî huzûr-ı şer‘de ikrâr ve i‘tirâf ve emriyle meblağ-ı mecmû‘-ı mezkûr sekiz bin yüz yetmiş sekiz guruş otuz paraya işbu hâzır bi’l-meclis mersûm Harman oğlu Filibus v. Arakil zimmî dahi kefâlet-i sahîha-i şer‘iye ile kefîl ve dâmin olmağla tashîhan li’l-kefâle vasî nasb olunan Markar oğlu Kirkor v. Mardıros zimmî dahi kefâlet-i mezkûreyi kabûl eylediği işbu mahalle şerh verildi. Fî 5 Receb sene 1238.